Subhashitam : విద్యాధనమే ప్రధానం
ABN , First Publish Date - 2022-12-01T23:43:25+05:30 IST
న చోరహార్యం న చ రాజహార్యం న భ్రాత్రుభాజ్యం న చ భారకారి వ్యయేకృతే వర్ధతే ఏవ నిత్యం విద్యాధనం సర్వధన ప్రధానం
న చోరహార్యం న చ రాజహార్యం న భ్రాత్రుభాజ్యం న చ భారకారి
వ్యయేకృతే వర్ధతే ఏవ నిత్యం విద్యాధనం సర్వధన ప్రధానం
విద్య గొప్పతనాన్ని వివరిస్తూ భర్తృహరి చెప్పిన సుభాషితం ఇది.
ఈ శ్లోకాన్ని ఏనుగు లక్ష్మణకవి...
హర్తకు గాదు గోచర మహర్నిశమున్‌ సుఖపుష్టిసేయు స
త్కీర్తి ఘటింతు విద్య యను దివ్యధనం బఖిలార్థకోటికిం
బూర్తిగ నిచ్చినన్‌ బెరుగు బోదు యుగాంతపువేళనైన భూ
భర్తలు తద్ధనాథికుల పట్టున గర్వము మాను టొప్పగున్‌... అని తెలుగువారికి అందించారు.
‘‘విద్యను దొంగలెవరూ అపహరించలేరు. రాజులు స్వాధీనం చేసుకోలేరు. ‘విద్య’ అనే ఆస్తిని అన్నదమ్ములతో పంచుకోనక్కర్లేదు. అంతేకాదు, దాన్ని మోసుకుపోవడం భారం కూడా కాదు. అంటే ఎక్కడికైనా తీసుకుపోవచ్చు. ఖర్చుపెట్టినా అది తరిగిపోదు. పైపెచ్చు దాన్ని ఇతరులకు పంచిన కొద్దీ పెరుగుతుంది. యుగాంతంలో కూడా నాశనం కాదు. అందుకే అన్ని ధనాల్లోనూ విద్యాధనమే ముఖ్యమైనది. అటువంటి ‘విద్య’ అనే ధనం కలిగిన వారి విషయంలో పాలకులు గర్వంతో వ్యవహరించకూడదు, ఆదరించాలి’’ అని భావం.
