అమెరికాలో ఘోర రోడ్డు ప్రమాదం.. ముగ్గురు తెలుగు విద్యార్థులు మృతి

ఎన్నారై డెస్క్: అగ్రరాజ్యం అమెరికాలో ఘోర రోడ్డు ప్రమాదం చోటు చేసుకుంది. ఈ ప్రమాదంలో ముగ్గురు తెలుగు విద్యార్థులు మృతి చెందారు. మరో ముగ్గురు విద్యార్థులు సహా ఇద్దరు డ్రైవర్లు గాయపడ్డారు. వీరిలో ఒకరి పరిస్థితి విషమంగా ఉన్నట్లు తెలుస్తోంది. ఈ నేపథ్యంలో ఇందుకు సంబంధించిన పూర్తి వివరాల్లోకి వెళితే..

అమెరికా(America) కాలమానం ప్రకారం మంగళవారం ఉదయం 5.15-5.30 గంటల సమయంలో ప్రమాదం చోటు చేసుకుంది. ఆరుగురు విద్యార్థులు ప్రయాణిస్తున్న మినీ వ్యాన్‌ను బోస్టన్ నగరం సమీపంలో ఎదురుగా వస్తున్న ట్రక్కు ఢీ(Accident) కొట్టింది. ఈ ప్రమాదంలో ముగ్గరు విద్యార్థులు అక్కడికక్కడే మృతి చెందారు. మరో ముగ్గురు విద్యార్థులు సహా.. మిని వ్యాన్, ట్రక్కు డ్రైవర్లు తీవ్రంగా గాయపడ్డారు. సమాచారం తెలిసిన వెంటనే అక్కడకు చేరుకున్న పోలీసులు.. ప్రమాదంలో గాయపడిన వారిని చికిత్స కోసం ఆసుపత్రికి తరలించారు. అయితే ముగ్గరు విద్యార్థుల్లో ఒకరి పరిస్థితి విషమంగా ఉన్నట్టు తెలుస్తోంది. మృతులను పాటంశెట్టి సాయి నరసింహా(తూర్పుగోదావరి), పావని (వరంగల్), ప్రేమ్‌కుమార్ రెడ్డి (హైదరాబాద్)గా పోలీసులు గుర్తించారు.

ఈ ఘటనపై పోలీసులు(US Police) స్పందిస్తూ.. వర్షం, పొగమంచు కారణంగా ప్రమాదం చోటు చేసుకుని ఉండొచ్చని అభిప్రాయపడ్డారు. ప్రమాదం జరిగిన తీరును తెలుసుకోవడానికి ఆసుపత్రిలో చికిత్స పొందుతున్న డ్రైవర్లను విచారించనున్నట్టు పేర్కొన్నారు. ఇదిలా ఉంటే.. తమ బిడ్డలు ప్రాణాలు కోల్పోయినట్టు తెలుసుకుని మృతుల తల్లిదండ్రులు సహా కుటుంబ సభ్యులు శోకసంద్రంలో మునిగిపోయారు.