Prabhas: ‘ప్రాజెక్ట్- కె’ రిలీజ్ ఎప్పుడంటే..?

‘బాహుబలి’ (Bahubali) ప్రాంచైజీతో ప్రపంచవ్యాప్తంగా అభిమానులను సంపాదించుకున్న నటుడు ప్రభాస్ (Prabhas). ఈ సినిమా తర్వాత అతడి నుంచి ‘సాహో’, ‘రాధేశ్యామ్’ చిత్రాలు వచ్చినా బాక్సాఫీస్ వద్ద ఆశించిన మేర వసూళ్లను రాబట్టలేదు. దీంతో అతడు భారీ హిట్ కొట్టాలని నాగ్ ఆశ్విన్ (Nag Ashwin) కు ఒకే చెప్పాడు. ‘ప్రాజెక్ట్- కె’ (Project K) లో నటిస్తున్నాడు. వైజయంతి మూవీస్ భారీ బడ్జెట్‌తో నిర్మిస్తుంది. దీపికా పదుకొణె (Deepika Padukone) హీరోయిన్‌గా నటిస్తుంది. అమితాబ్ బచ్చన్ (Amitabh Bachchan) కీలక పాత్ర పోషిస్తున్నాడు. మూడో ప్రపంచ యుద్ధం నేపథ్యంలో సినిమా రూపొందుతుంది. తాజాగా ఈ చిత్రానికి సంబంధించిన ఆసక్తికరమైన వార్త ఫిల్మ్‌నగర్‌లో చక్కర్లు కొడుతుంది.

ప్రాజెక్ట్-కె సినిమాను వచ్చే ఏడాది దసరా కానుకగా థియేటర్స్‌లోకి తీసుకువస్తామని గతంలో మేకర్స్ తెలిపారు. కానీ, విజువల్ ఎఫెక్ట్స్ ఆలస్యమవుతుండటంతో మూవీ రిలీజ్ డేట్‌ను పోస్ట్‌పోన్ చేసినట్టు తెలుస్తోంది. ఈ చిత్రం 2024 వేసవిలో విడుదల కానుందని ఫిల్మ్‌నగర్ వర్గాలు తెలుపుతున్నాయి. ఈ ఏడాది చివరలో లేదా వచ్చే ఏడాది ప్రారంభంలో ‘ప్రాజెక్ట్-కె’ చిత్రీకరణ పూర్తవుతుంది. మూవీ షూటింగ్ పూర్తి కాగానే టీమ్ అంతా పోస్ట్ ప్రొడక్షన్‌ కోసం సమయాన్ని వెచ్చించనుంది. ఫ్యూచరిస్టిక్‌గా సినిమాగా రూపొందుతుండటంతో ప్రాజెక్ట్‌లో విజువల్ ఎఫెక్ట్స్ ఎక్కువగా ఉన్నాయి. పోస్ట్ ప్రొడక్షన్ వర్క్‌కు దాదాపు ఒక్క ఏడాది పడుతుందని అంచనా. వైజయంతి మూవీస్‌ను 1974లో స్థాపించారు. ప్రొడక్షన్ హౌస్ 2024లో 50ఏళ్లు పూర్తి చేసుకుంటుంది. 50‌ఏళ్లు పూర్తవుతున్న సందర్భంగా సినిమాను విడుదల చేయాలని మేకర్స్ భావిస్తున్నారు. ప్రస్తుతానికి 2024, ఏప్రిల్ 10ని రిలీజ్ డేట్‌గా అనుకుంటున్నారు. ఏమైనా ఇబ్బందులు తలెత్తితే ఆ డేట్‌ను పోస్ట్ పోన్ చేస్తూ ఏప్రిల్ చివరి వారంలో విడుదల చేస్తారు. ‘బాహుబలి-2’ ని కూడా ఏప్రిల్ చివరి వారంలోనే రిలీజ్ చేసిన సంగతి తెలిసిందే.