Team India Worst Record: న్యూజిలాండ్‌పై భారత్ చెత్త రికార్డు!

ఆక్లాండ్: న్యూజిలాండ్‌(New Zealand)తో జరిగిన తొలి వన్డేలో ఓడిన భారత జట్టు ఓ చెత్త రికార్డును మూటగట్టుకుంది. ఈ మ్యాచ్‌తో టీమిండియా (Team India) బ్యాటర్లు సత్తా చాటినప్పటికీ వికెట్లు తీయడంలో బౌలర్లు ఇబ్బంది పడ్డారు. ఫలితంగా ఆతిథ్య జట్టు ఏడు వికెట్ల తేడాతో ఘన విజయం సాధించి మూడు మ్యాచ్‌ల వన్డే సిరీస్‌లో 1-0తో ముందంజ వేసింది. న్యూజిలాండ్‌పై భారత్‌కు ఇది వరుసగా ఐదో ఓటమి. కివీస్‌ (Kiwis)పై వరుసగా ఇన్ని మ్యాచుల్లో భారత జట్టు ఓటమి పాలు కావడం ఇదే తొలిసారి. అంతేకాదు, భారత్‌పై న్యూజిలాండ్‌కు ఇది రెండో అత్యధిక రన్ ఛేజింగ్ కూడా.

ఈ మ్యాచ్‌లో తొలుత బ్యాటింగ్ చేసిన భారత జట్టు శిఖర్ ధవన్ (77), శుభమన్ గిల్ (50), శ్రేయాస్ అయ్యర్ (80) రాణించడంతో నిర్ణీత 50 ఓవర్లలో 7 వికెట్ల నష్టానికి 306 పరుగులు చేసింది. అనంతరం 307 పరుగుల లక్ష్యంతో బ్యాటింగ్ ప్రారంభించిన విలయమ్సన్ సేన 47.1 ఓవర్లలో మూడు వికెట్లు మాత్రమే కోల్పోయి విజయాన్ని అందుకుంది. కేన్ విలియమ్సన్ (94), టామ్ లాథమ్ (145) వీరబాదుడుతో జట్టుకు విజయాన్ని అందించి పెట్టారు.