New Year: కల్పతరు పర్వదినోత్సవాన బంపరాఫర్

హైదరాబాద్: పుస్తక ప్రియులకు హైదరాబాద్ రామకృష్ణ మఠం(Ramakrishna Math) 2023లో తొలిరోజే బంపరాఫర్ ప్రకటించింది. కల్పతరు పర్వదినోత్సవం (Kalpataru day) సందర్భంగా వివేకానంద సాహిత్యంతో పాటు పుస్తకాలపై 40 శాతం డిస్కౌంట్ ఇస్తున్నట్లు హైదరాబాద్ రామకృష్ణ మఠం అధ్యక్షులు స్వామి బోధమయానంద (Swami Bodhamayananda) తెలిపారు. అంతేకాదు కల్పతరు పర్వదినం సందర్భంగా రామకృష్ణ మఠంలో విశేష పూజలు, భజనలు, హోమం, ఆరాత్రికంతో పాటు ప్రత్యేక కార్యక్రమాలు ఏర్పాటు చేశామన్నారు. కల్పతరు పర్వదినోత్సవ ప్రాధాన్యాన్ని తెలిపే ప్రసంగం కూడా ఉంటుందని, భక్తులు పెద్ద సంఖ్యలో పాల్గొనాలని సూచించారు.

1886 జనవరి ఒకటిన పశ్చిమబెంగాల్‌లోని కాశీపూర్‌ ఉద్యానవనంలో మధ్యాహ్నం 3 గంటల సమయంలో శ్రీరామకృష్ణ పరమహంస కల్పవృక్షంలా మారి భక్తుల కోరికలు తీర్చిన సందర్భాన్ని పురస్కరించుకుని ప్రతియేటా రామకృష్ణ మఠం, మిషన్ కేంద్రాల్లో జనవరి ఒకటిన కల్పతరు దినోత్సవాన్ని వైభవంగా నిర్వహిస్తున్నారు.

రామకృష్ణ మఠంలో యోగా, ధ్యానం, వ్యక్తిత్వ వికాసం, ఆత్మవిశ్వాసం, నాయకత్వ లక్షణాలు పెంపొందింప చేసే కోర్సులు కూడా నిర్వహిస్తున్నారు. మహిళలకు, న్యాయవాదులకు కూడా ప్రత్యేక కోర్సులున్నాయి. బాలల కోసం బాల వికాస్ నిర్వహిస్తున్నారు. మరిన్ని వివరాలకు 040-27627961, 9177232696 నెంబర్లలో సంప్రదించవచ్చని రామకృష్ణ మఠం ప్రతినిధులు తెలిపారు.

రామకృష్ణ మఠం పని వేళలు : ఉదయం 8.30 గంటల నుంచి 11.30 గంటల వరకు; సాయంత్రం 4.30 గంటల నుంచి 7.30 గంటల వరకు.