ISRO: మరో వాణిజ్య రంగ ప్రయోగానికి ఇస్రో సన్నద్ధం

సూళ్లూరుపేట: మరో ప్రతిష్ఠాత్మక ప్రయోగానికి భారత అంతరిక్ష పరిశోధన సంస్థ (ఇస్రో) సన్నద్ధమైంది. ఈనెల 26న తిరుపతి జిల్లా శ్రీహరికోట (Sriharikota)లోని సతీష్‌ థావన్‌ స్పేస్‌ సెంటర్‌ (షార్‌) నుంచి ఎల్‌వీఎం3-ఎం3 రాకెట్‌ను ప్రయోగించనున్నారు. షార్‌లోని రెండో ప్రయోగ వేదిక నుంచి జరిగే ఈ రాకెట్‌ ప్రయోగం ద్వారా వన్‌వెబ్‌ ఇండియా-2 పేరుతో ఒకేసారి 36 ఉపగ్రహాలను కక్ష్యలోకి ప్రవేశపెట్టనున్నారు. రాకెట్‌ (Rocket) మూడు దశల అనుసంధాన పనులను శాస్త్రవేత్తలు పూర్తిచేసి ప్రయోగ వేదికపై సిద్ధం చేశారు.ఈ నెల 26న ఉదయం 9 గంటలకు షార్‌లోని రెండో ప్రయోగ వేదిక నుంచి ఎల్‌వీఎం3-ఎం3 రాకెట్‌ నింగిలోకి దూసుకెళ్లనుంది. ఈ ప్రయోగానికి సంబంధించిన కౌంట్‌డౌన్‌ (Countdown) 24 గంటలు ముందు నిర్వహించనున్నారు. కౌంట్‌డౌన్‌కు ముందు రాకెట్‌ రిహార్సల్‌, ప్రీ కౌంట్‌డౌను అదే రోజు నిర్వహించనున్నారు. వాణిజ్యపరంగా ఇస్రోలో అంతర్భాగంగా ఉన్న న్యూ స్పేస్‌ ఇండియా లిమిటెడ్‌తో కుదుర్చుకొన్న ఒప్పందంలో భాగంగా ఇస్రో ఈ వాణిజ్య రంగ ప్రయోగాన్ని నిర్వహిస్తోంది.