జగన్‌ ఓడాలి... రాష్ట్రం గెలవాలిc

● ప్రతిపక్ష నేత చంద్రబాబు పిలుపు

● టీడీపీలో చేరిన కృష్ణా జిల్లా వైసీపీ నేత

అమరావతి, జూన్‌ 30(ఆంధ్రజ్యోతి): ‘‘నేనొకటే చెప్తున్నా... వచ్చే ఎన్నికల్లో జగన్‌ ఓడాలి, రాష్ట్రం గెలవాలి, సైకో పోవాలి, సైకిల్‌ రావాలి. అప్పుడే రాష్ట్రానికి న్యాయం జరుగుతుంది. ప్రజలకు మంచి జరుగుతుంది. నేను నా కోసం కాదు... రాష్ట్రం కోసం ఆలోచిస్తున్నా’’ అని టీడీపీ అధినేత, ప్రతిపక్ష నేత చంద్రబాబు అన్నారు. సీఎం జగన్‌ని, వైసీపీని ఓడించడానికి అన్ని వర్గాలు కలిసి రావాలని పిలుపునిచ్చారు. శుక్రవారం మంగళగిరిలోని టీడీపీ జాతీయ కార్యాలయంలో చంద్రబాబు సమక్షంలో కృష్ణా జిల్లా వైసీపీ ప్రధాన కార్యదర్శి సుభాష్‌ చంద్రబోస్‌, అతని అనుచరులు టీడీపీలో చేరారు. వారందరికీ పసుపు కండువా కప్పి, పార్టీలోకి ఆహ్వానించారు. ఈ సందర్భంగా చంద్రబాబు మాట్లాడారు. ‘‘రాష్ట్రాన్ని తెలుగుదేశం తప్ప ఎవ్వరూ కాపాడలేరని పార్టీలోకి వచ్చిన వైసీపీ నేత సుభాష్‌ చంద్రబోస్‌ను అభినందిస్తున్నా. అతనితో పాటు మాజీ సర్పంచ్‌లు, మాజీ ఎంపీటీసీలు, ఇతర నేతలకు ఆహ్వానం. కరుడుకట్టిన నేరస్తుడిని నమ్మి సీఎంని చేసి, ప్రజలంతా మోసపోయారు. మనం అధికారంలో ఉండి ఉంటే విద్యుత్‌ చార్జీలు పెంచాల్సిన అవసరం ఉండేది కాదు’’ అని చంద్రబాబు అన్నారు. కార్యక్రమంలో అవనిగడ్డ నియోజకవర్గ ఇన్‌చార్జి మండలి బుద్ధ ప్రసాద్‌ తదితరులు పాల్గొన్నారు.