మార్కెట్లోకి హుండై ఎక్స్‌టర్‌

ప్రారంభ ధర రూ.5.99 లక్షలు

న్యూఢిల్లీ: హుండై మోటార్‌ ఇండియా ఎంట్రీ స్థాయి ఎస్‌యూవీల విభాగంలోకి ప్రవేశించింది. సరికొత్త మోడల్‌ ఎక్స్‌టర్‌ను మార్కెట్లో విడుదల చేసింది. ఢిల్లీలో దీని ఎక్స్‌ షోరూమ్‌ ధర రూ.5.99 లక్షల నుంచి రూ.9.31 లక్షల మధ్యన ఉంటుంది. మార్కెట్లో టాటా పంచ్‌కు గట్టి పోటీ ఇస్తుందనుకుంటున్న ఈ కారు 1.2 లీటర్‌ పెట్రోల్‌ ఇంజన్‌ సామర్థ్యంతో మాన్యువల్‌, ఆటోమేటిక్‌ వేరియంట్ల లో అందుబాటులో ఉంటుంది. లీటరుకు 19.4 కిలోమీటర్ల మైలేజి ఇస్తుంది. ఇందులో 5 స్పీడ్‌ ఆటోమేటిక్‌ వేరియెంట్‌ ధర రూ.7.96 లక్షలు. సీఎన్‌జీ కారు ధర రూ.8.23 లక్షలు. ఈ వేరియెంట్‌ కేజీ గ్యాస్‌కు 27.1 కిలోమీటర్ల మైలేజి ఇస్తుంది. ఈ కారు విడుదలతో తమ కంపెనీ పూర్తి స్థాయి ఎస్‌యూవీ ఉత్పత్తిదారుగా మారిందని కంపెనీ ఎండీ, సీఈఓ ఉన్సూ కిమ్‌ అన్నారు.