Butter milk: అతిగా తాగుతున్నారా? అయితే ఈ సమస్యలు తప్పవు!

మజ్జిగ అనేక రోగాల నివారిణి. మన శరీరంలో ఆరోగ్యకరమైన బ్యాక్టీరియా పెరగటానికి ప్రధానమైన కారణం మజ్జిగే! అయితే ‘‘అతి సర్వత్రా వర్జియేత్‌’’ అన్నట్లు మజ్జిగను కూడా అతిగా తాగటం మంచిది కాదు. దీని వల్ల ఊహించిన విధంగా ఆరోగ్య సమస్యలు ఎదురయ్యే అవకాశముంది. అవేమిటో ఇప్పుడు చూద్దాం..

లేక్టోజ్‌ సమస్యలు: పాలు.. పెరుగులలో లేక్టోజ్‌ అనే పదార్థం ఉంటుంది. ఇది కొందరికి పడదు. లేక్టోజ్‌ పడకపోతే కడుపునెప్పి.. అజీర్తి, విరోచనాల వంటి రకరకాల సమస్యలు ఎదురవుతూ ఉంటాయి. సాధారణంగా చిన్నపిల్లల్లో ఈ సమస్యలు ఎక్కువగా కనిపిస్తాయి. కొన్ని సార్లు పెద్దవారికి కూడా లేక్టోజ్‌ సమస్యలు ఎదురయ్యే అవకాశముంది. ఇదే విధంగా కొందరికి మజ్జిగలో ఉండే మిల్క్‌ ప్రొటీన్‌లు పడకపోవచ్చు. వీటి వల్ల చర్మంపై దద్దుర్లు వంటివి రావచ్చు. అందువల్ల మజ్జిగను అతిగా తాగకపోవటం మంచిది.

కేలరీలు కూడా: పాలతో పోలిస్తే మజ్జిగలో తక్కువ కేలరీలు ఉంటాయి. అయితే ఇటీవల కాలంలో రకరకాల రుచులున్న మజ్జిగలు మార్కెట్‌లోకి ప్రవేశించాయి. వీటిలో చక్కెరశాతం చాలా ఎక్కువ ఉంటోంది. అంటే కేలరీలు కూడా ఎక్కువే ఉంటాయి. అందువల్ల ఎక్కువ కేలరీలు ఉన్న మజ్జిగ తాగటం మంచిది కాదు.

ఉప్పు కూడా: చాలా మంది ఇంట్లో చేసిన మజ్జిగ కన్నా మార్కెట్‌లో అందుబాటులో ఉన్న బ్రాండెడ్‌ మజ్జిగను తాగటానికి ఇష్టపడతారు. దీనికి కారణం అది ఎక్కువగా రుచిగా ఉండటమే! ఇలా రుచిగా ఉండటానికి ఈ మజ్జిగలో ఎక్కువగా ఉప్పు, శోంఠి, కరివేపాకు పొడి మొదలైనవి కలుపుతారు. ఇవి కొందరికి పడవు.