Nepal Plane crash: 68కి పెరిగిన విమాన ప్రమాద మృతుల సంఖ్య

ఖాట్మండు: నేపాల్‌(Nepal)లో యెటి ఎయిర్‌లైన్స్‌ (Yeti airlines)కు చెందిన ఏటీఆర్-72 విమానం పోఖారా విమానాశ్రయం(Pokhara airport)లో కుప్పకూలిపోయిన ఘటనలో మృతుల సంఖ్య 68కి పెరిగింది. ఇప్పటివరకూ 68 మృతదేహాలను వెలికితీశామని నేపాల్ పౌర విమానయాన శాఖ(Nepal Civil Aviation authority) ప్రకటించింది. ప్రస్తుతానికి సెర్చ్ ఆపరేషన్ నిలిపివేశారు. ఘటన నేపథ్యంలో నేపాల్‌లో సోమవారం సంతాపదినంగా పాటించాలని ప్రభుత్వం నిర్ణయించింది. సాంకేతిక లోపం వల్లే విమానం కుప్పకూలిందని అంచనా వేశారు.

విమానం కూలిన సమయంలో విమానంలో నలుగురు సిబ్బంది, 68 మంది ప్రయాణికులు ఉన్నారు. ప్రయాణికుల్లో 53 మంది నేపాలీలు, ఐదుగురు భారతీయులు, నలుగురు రష్యన్లు, ఒకరు ఐరిష్, ఇద్దరు కొరియన్లు, అర్జంటైనా జాతీయుడొకరు, ఫ్రెంచ్ జాతీయుడొకరు ఉన్నారు. ఈ విమానం త్రిభువన్ అంతర్జాతీయ విమానాశ్రయం నుంచి ఆదివారం ఉదయం 10.33 గంటలకు బయల్దేరింది. ఖాట్మండు నుంచి పోఖారా వెళ్తుండగా సేతి గండకి నది పరీవాహక ప్రాంతంలోని అటవీ ప్రదేశంలో ఈ దుర్ఘటన జరిగింది.

నేపాల్‌లోని పోఖారా అంతర్జాతీయ విమానాశ్రయం సమీపంలో విమానం కుప్పకూలిపోవడానికి ముందు తన దిశను కోల్పోయినట్లు ఓ వీడియోలో కనిపిస్తోంది. కుప్పకూలిపోవడానికి కొద్ది సెకండ్ల ముందు ఆ విమానం తలక్రిందులవుతున్నట్లుగా ఒరిగిపోవడం కనిపించింది. ఈ విమానాశ్రయానికి సమీపంలోని ఓ భవనంపై నుంచి ఓ వ్యక్తి ఈ వీడియోను చిత్రీకరించి, సామాజిక మాధ్యమాల్లో పోస్ట్ చేశారు.