NRI: లండన్‌లో భారత సంతతి వ్యక్తి దారుణ హత్య

ఇంటర్నెట్ డెస్క్: కేరళకు చెందిన ఓ వ్యక్తి లండన్‌లో(London) దారుణ హత్యకు గురయ్యాడు. ఆయనతో కలిసి ఫ్లాట్‌లో అద్దెకుంటున్న మరో కేరళ వ్యక్తి అతడిని కత్తితో పొడిచి చంపేశాడు. పదేళ్ల క్రితం విద్యా్ర్థి వీసాపై బ్రిటన్‌కు వెళ్లిన అరవింద్ శశికుమార్, లండన్‌లోని క్యాంబర్‌వెల్ ప్రాంతంలో ఉంటున్నాడు. మరో ముగ్గురు కేరళ వాసులతో కలిసి ఓ ఫ్లాట్‌లో నివాసం ఉంటున్నాడు. కాగా, శుక్రవారం అరవింద్‌కు, సల్మాన్ సలీం మధ్య వివాదం మొదలైంది. ఈ క్రమంలో సలీమ్ అరవింద్‌ను ఛాతిలో కత్తితో పొడిచాడు(Indian Man stabbed to death by roommate).

అప్పటికే, పోలీసులకు సమాచారం అందటంతో వారు ఘటన స్థలానికి చేరుకునే సరికి అరవింద్ మెట్లపై అచేతనంగా కనిపించాడు. అంబులెన్స్ వచ్చే సమయానికి అతడు మృతి చెందాడు. కాగా, ఛాతిపై గాయం కారణంగానే అరవింద్ మృతిచెందినట్టు పోస్ట్‌మార్టంలో తేలింది. ఈ క్రమంలో పోలీసులు నిందితుడిని అదుపులోకి తీసుకున్నారు. అతడిపై హత్యానేరం కింద కేసు నమోదు చేశారు. ఇక అరవింద్-సల్మాన్ మధ్య ఘర్షణకు సాక్షులుగా నిలిచి మిగితా ఇద్దరు రూం మేట్స్‌ను కూడా వారు అదుపులోకి తీసుకుని ప్రశ్నిస్తున్నారు.