Viral News: ఒకే ఒక్క పాము వల్ల.. ముగ్గురి ప్రభుత్వ ఉద్యోగాలు ఊస్ట్.. అసలేం జరిగిందో తెలిస్తే అవాక్కవడం ఖాయం..!
ABN , First Publish Date - 2023-07-10T17:26:59+05:30 IST
అక్రమంగా అరెస్టు చేసిన ఓ వ్యక్తిని జైల్లో పాము కాటేయడంతో ముగ్గురు పోలీసులపై స్పెన్షన్ వేటు పడింది. బాధితుడిని వారు అక్రమంగా అరెస్ట్ చేశారన్న విషయం పాము కాటుతో వెలుగులోకి వచ్చింది. రాజస్థాన్‌లోని జైపూర్ జిల్లాలో ఈ ఘటన వెలుగు చూసింది.
ఇంటర్నెట్ డెస్క్: ఇలాంటి ఘటన బహుశా దేశంలో ఎక్కడా జరిగి ఉండదు. ఓ పాము కారణంగా ముగ్గురు పోలీసు ఆఫీసర్లు సస్పెండయ్యారు. అసలేం జరిగిందో తెలిస్తే ఆశ్చర్యం కలగక మానదు. రాజస్థాన్‌లో ఘటన జరిగింది.
జైపూర్ జిల్లా ఖెజ్రోలీ ప్రాంతానికి చెందిన భగవాస్ సాహేపై రూ.20 లక్షలకు సంబంధించి చీటింగ్ కేసు నమోదైంది. అరెస్టుకాకుండా ఉండేందుకు అతడు ముందస్తు బెయిల్ కూడా పొందాడు. కానీ స్థానిక పోలీసులు ఇటీవల అతడిని అక్రమంగా అదుపులోకి తీసుకున్నారు. ఈ విషయాన్ని పైఅధికారులకు చెప్పలేదు. అతడిని స్టేషన్‌లోని సెల్‌లో పెట్టినట్టు రికార్డుల్లో కూడా రాయలేదు. ఇక ఇంటరాగేషన్ సందర్భంగా పోలీసులు అతడిని కొట్టినట్టు కూడా వార్తలు వెలువడ్డాయి. కాగా, ఆ రాత్రి అతడిని పాము కాటు వేయడంతో అతడు అచేతన స్థితిలోకి వెళ్లిపోయాడు. స్పృహ లేకుండా పడి ఉన్న అతడిని అధికారులు ఆ మరుసటి రోజు గుర్తించి వెంటనే ఆసుపత్రికి తరలించారు. దీంతో, విషయం ఉన్నతాధికారుల వరకూ వెళ్లింది. దీంతో, అక్రమఅరెస్టుకు తెరతీసిన ఏఎస్ఐ ప్రహ్లాద్ సింగ్, కానిస్టేబుళ్లు శిశురామ్, మహీపాల్‌పై సస్పెన్షన్ వేటు పడింది. కాగా, బాధితుడు ప్రస్తుతం ఆసుపత్రిలో చికిత్స పొందుతున్నాడు.
ఇటీవల కాలంలో కురుస్తున్న వర్షాలకు రాజస్థాన్‌లో పాముల బెడద ఎక్కువైందని అక్కడి ప్రజలు చెబుతున్నారు. ఇళ్లల్లో కూడా పాములు వచ్చేస్తున్నాయని అంటున్నారు. కోటాలోని ఓ వ్యక్తి తృటిలో ప్రాణాపాయం నుంచి తప్పించుకున్నాడు. తన ఇంట్లోకి పాము రావడాన్ని అతడు గమనించడంతో పెను ప్రమాదం తప్పింది.
