Gaalodu OTT Streaming: ఓటీటీలోకి వచ్చేస్తున్న సుడిగాలి సుధీర్ మూవీ.. ఎప్పటినుంచంటే..

నటుడు, కమెడియన్ సుడిగాలి సుధీర్‌ (Sudigali Sudheer) కి ఉన్న పాపులారిటీ అందరికీ తెలిసిందే. ఓ ప్రముఖ కామెడీ షో ద్వారా తన నటన ప్రస్థానాన్ని ప్రారంభించిన ఈ నటుడు ఓ వైపు యాంకరింగ్.. మరోవైపు నటనని కొనసాగిస్తూ దూసుకుపోతున్నాడు. అలాగే.. సినిమాల్లో ఓ కమెడియన్‌గా చేస్తూనే.. ఇంకోవైపు హీరోగా నటిస్తున్నాడు. ఆయన తాజాగా నటించిన చిత్రం ‘గాలోడు’. గెహన సిప్పి (Gehna Sippy) హీరోయిన్‌గా నటించగా.. స‌ప్త‌గిరి (Sapthagiri), ష‌క‌ల‌క శంకర్ (Shakalaka Shankar) త‌దిత‌రులు ప్రధాన పాత్రలు పోషించారు. పులిచర్ల రాజశేఖర్ రెడ్డి దర్శకత్వం వహించిన ఈ చిత్రం నవంబర్ 18న థియేటర్స్‌లో విడుదలైంది. మూవీకి మంచి టాక్ రావడంతో తక్కువ బడ్జెట్‌తో తెరకెక్కిన ఈ మూవీ నిర్మాతలకి లాభాలను తెచ్చిపెట్టింది.

ఇది కూడా చదవండి: Hunt OTT streaming: ఓటీటీలోకి వచ్చేసిన ‘హంట్’.. స్ట్రీమింగ్ ఎక్కడంటే..

అయితే, సుధీర్ ఇంతకుముందే పలు సినిమాల్లో హీరోగా చేసినప్పటికీ అవి ఫెయిల్యూర్‌గా నిలిచాయి. ఈ తరుణంలో వచ్చిన ఈ మూవీతో సుధీర్‌కి విజయం దక్కింది. ఈ నేపథ్యంలోనే ఈ చిత్రం తాజాగా ఓటీటీ స్ట్రీమింగ్ సిద్ధమైంది. గతంలోనే ఈ మూవీ ఓటీటీ స్ట్రీమింగ్ రైట్స్‌ని ఆహా వీడియో (Aha Video) సొంతం చేసుకుంది. తాజాగా ఫిబ్రవరి 17 నుంచి ఈ చిత్రాన్ని స్ట్రీమింగ్ చేయనున్నట్లు సోషల్ మీడియా వేదికగా ఆహా అధికారికంగా ప్రకటించింది. అందులో.. ‘డ్యాన్స్ ఇరుక్కు (ఉంది).. కామెడీ ఇరుక్కు (ఉంది).. యాక్షన్ ఇరుక్కు (ఉంది).. చాలా ఎంటర్‌టైన్ ఇరుక్కు (ఉంది).. సూపర్ హిట్ గాలోడు ఫిబ్రవరి 17 నుంచి కేవలం ఆహాలోనే స్ట్రీమింగ్ అవుతుంది’ అని రాసుకొచ్చారు.