Viral: లాటరీ టిక్కెట్లన్నీ ఒకేసారి కొనేయడంతో దిమ్మతిరిగే ఫలితం! ఎంత గెలిచాడో తెలిస్తే..

ఇంటర్నెట్ డెస్క్: అమెరికాకు(USA) చెందిన ఓ వ్యక్తి ఊహించని విధంగా కోటీశ్వరుడైపోయాడు. తొలిసారి లాటరీలో గెలిచిన డబ్బుతో కొంత మొత్తాన్ని వెచ్చించి లాటరీ టిక్కెట్లన్నీ కొనేయడంతో అతడు రాత్రికి రాత్రి కోటీశ్వరుడైపోయారు. కాలిఫోర్నియాలో ఈ ఉదంతం వెలుగు చూసింది. వాంగ్ చా అనే వ్యక్తి కొన్ని రోజుల క్రితం స్థానికంగా ఉన్న మైక్స్ స్టోర్ అనే షాపులో ఓ లాటరీ టెక్కెట్టు(Scratch off tickets) కొన్నాడు. దీంతో, అతడు 500 డాలర్లు ( సుమారు రూ.41 వేలు) గెలుపొందాడు. ఇలాంటి పరిస్థితుల్లో చాలా మంది వచ్చిన సొమ్ముతో సంతృప్తి పడిపోతారు. వచ్చిన గాడికి చాల్లే అనుకుంటూ లాటరీ డబ్బును తమ అవసరాల కోసం వినియోగించుకుంటారు తప్ప మళ్లీ లాటరీ టిక్కెట్లు కొనరు.

అయితే, వాంగ్ చా మాత్రం కాస్త డిఫరెంట్‌గా ఆలోచించాడు. లాటరీలో తను గెలిచిన సొమ్ములోంచి సుమారు 300 డాలర్లతో షాపులోని లాటరీ టెక్కెట్లన్నీ కొనుగోలు చేశాడు(California man buys all lottery tickets). ఇలా టిక్కెట్లన్నీ కొనేస్తే ఏదోక దానికి లాటరీ తగులుతుందని అతడి భావన. అతడి ఆలోచనకు కాస్తంత అదృష్టం కూడా తోడవడంతో అంచనాలు నిజమయ్యాయి. ఈ మారు ఏకంగా అతడు ఒక మిలియన్ డాలర్లను(సుమారు రూ.8 కోట్లు) గెలుచుకున్నాడు. దీంతో, అతడి ఆనందానికి అంతేలేకుండా పోయింది.

లాటరీ గెలిచినట్టు ఫోన్‌లో వచ్చిన కబురు విని అస్సలు నమ్మలేకపోయానని వాంగ్ చెప్పాడు. కాస్తంత తేరుకున్నాక అతడు దేవుడికి ధన్యవాదాలు చెప్పుకున్నాడు. ఈ డబ్బుతో తన కుటుంబానికి ఆర్థిక భద్రత కల్పిస్తానని, వారి బంగరు భవిష్యత్తు కోసం ఏర్పాట్లు చేస్తానని స్థానిక మీడియాకు వాంగ్ తెలిపాడు.