Bus Accident: స్కూల్ బస్సు ఢీకొని ఐదేళ్ల చిన్నారి మృతి

రంగారెడ్డి: జిల్లాలోని ఆదిభట్ల పోలీస్ స్టేషన్ పరిధిలోని నాదర్గుల్ గ్రామంలో విషాదం చోటు చేసుకుంది. మంగళవారం ఉదయం రాజీవ్ గృహకల్ప కాలనీలో స్కూల్ బస్సు ఢీకొని ఐదు సంవత్సరాల చిన్నారి భావన(5) మృతి చెందింది. బాలాపూర్‌కు చెందిన సిస్టర్ నివేదితకు చెందిన స్కూల్ బస్సు నదర్గుల్‌లోని రాజీవ్ గృహ కల్ప విద్యార్థులను దించి వెళుతుండగా కాలనీకి చెందిన భావనను ఢీకొట్టింది. తీవ్రంగా గాయపడిన బాలిక అక్కడికక్కడే మృతి చెందింది. బాలిక మృతితో ఆగ్రహించిన కాలనీకి చెందిన వారు బస్సు అద్దాలు ధ్వంసం చేశారు. సమాచారం అందిన వెంటనే పోలీసులు అక్కడకు చేరుకుని చిన్నారి మృతదేహాన్ని పోస్టుమార్టం నిమిత్తం ఇబ్రహింపట్నం ప్రభుత్వాస్పత్రికి తరలించారు. ప్రమాదంపై పోలీసులు కేసు నమోదు చేసి దర్యాప్తు చేపట్టారు. చిన్నారి మృతితో తల్లిదండ్రులు కన్నీరుమున్నీరుగా విలపిస్తున్నారు.