TS News: కారును ఢీకొంటూ దూసుకెళ్లిన లారీ

రంగారెడ్డి: జిల్లాలోని రాజేంద్రనగర్‌లో ఓ లారీ బీభత్సం సృష్టించింది. మంగళవారం ఉదయం వ్యవసాయ కళాశాల వద్ద వేగంగా దూసుకొచ్చిన లారీ అదుపుతప్పి ఆగి ఉన్న కారును ఢీకొట్టింది. ఈ ఘటనలో లారీ డ్రైవర్ ఘటనాస్థలిలోనే మృతి చెందగా.. కారులో ప్రయాణిస్తున్న వ్యక్తి స్వల్ప గాయాలతో బయటపడ్డాడు. ధాన్యం లోడ్‌‌తో వెళ్తున్న లారీ ప్రమాదానికి గురైంది. కారును ఢీకొన్న అనంతరం లారీ ఓ పక్కకు ఒరిగిపోయింది. కాగా కారు పాక్షికంగా ధ్వంసమైంది. లారీ కర్నూలు నుంచి హైదరాబాద్‌కు వస్తుండగా ప్రమాదం చోటు చేసుకుంది. డ్రైవర్ నిద్రమత్తే ప్రమాదానికి కారణంగా తెలుస్తోంది. సమాచారం అందిన వెంటనే పోలీసులు అక్కడకు చేరుకుని మృతదేహాన్ని స్వాధీనం చేసుకుని ప్రభుత్వాస్పత్రికి తరలించారు. కేసు నమోదు చేసి దర్యాప్తు చేపట్టారు. రోడ్డుపై ఉన్న లారీని తొలగించేందుకు పోలీసులు చర్యలు చేపట్టారు.