అయ్యన్నకు అమెరికాలో జీవిత సాఫల్య పురస్కారం
ABN , Publish Date - Oct 01 , 2024 | 04:49 AM
రాష్ట్ర శాసనసభ స్పీకరు చింతకాయల అయ్యన్న పాత్రుడు అమెరికాలో జీవిత సాఫల్య పురస్కారాన్ని అందుకున్నారు.
గ్రేటర్‌ వాషింగ్టన్‌ తెలుగు సాంస్కృతిక సంఘ స్వర్ణోత్సవాల్లో ప్రదానం
అమరావతి, సెప్టెంబరు 30(ఆంధ్రజ్యోతి): రాష్ట్ర శాసనసభ స్పీకరు చింతకాయల అయ్యన్న పాత్రుడు అమెరికాలో జీవిత సాఫల్య పురస్కారాన్ని అందుకున్నారు. అక్కడ రెండు రోజులపాటు అత్యంత వైభవంగా నిర్వహించిన గ్రేటర్‌ వాషింగ్టన్‌ తెలుగు సాంస్కతిక సంఘం స్వర్ణోత్సవాల్లో ఆ సంఘం అధ్యక్షుడు కృష్ణలాం, తానా మాజీ అధ్యక్షుడు, టీడీపీ రాష్ట్ర కార్యనిర్వాహక కార్యదర్శి సతీష్‌ వేమన... స్పీకరుకు లైఫ్‌ టైమ్‌ అచీవ్‌మెంట్‌ అవార్డును అందజేసి ఘనంగా సత్కరించారు. అమెరికాలో వేలాది మంది తెలుగువారి సమక్షంలో స్వర్ణోత్సవ వేడుకల శుభవేళ తనకు పురస్కారాన్ని అందజేసి సత్కరించినందుకు ధన్యవాదాలు తెలుపుతూ స్పీకరు అయ్యన్న ప్రసంగించారు. ఆంధ్రప్రదేశ్ అభివృద్ధికి, మాతృభూమి, మాతృభాష పరిరక్షణ కోసం అందరం కలిసికట్టుగా ముందుకు సాగాలని ఆయన పిలుపునిచ్చారు. ఏపీని మాతృ భూమి, భాషలను కాపాడుకోవడం తెలుగువారి అందరి బాధ్యతని తానా మాజీ అధ్యక్షులు, జయరాం కోమటి, సతీష్‌ వేమన, గంగాధర్‌ నాదెళ్ల అన్నారు.
