14న జాతీయ లోక్‌ అదాలత

జిల్లా న్యాయ సేవాధికార సంస్థ కార్యదర్శి

కర్నూలు లీగల్‌, డిసెంబరు 4 (ఆంధ్రజ్యోతి): ఈ నెల 14న జాతీయ లోక్‌ అదాలత నిర్వహిస్తున్నట్లు జిల్లా న్యాయ సేవాధికార సంస్థ కార్యదర్శి బి.లీలా వెంకట శేషాద్రి వెల్లడించారు. అందులో ఎక్కువ కేసులు పరిష్కారమయ్యేందుకు పోలీసులు కృషి చేయాలని ఆయన పిలుపునిచ్చారు. ఈ మేరకు బుధవారం స్థానిక లోక్‌ అదాలత కార్యాలయంలో పోలీసు అధికారులతో సమీక్ష నిర్వహించారు. ఈ సందర్భంగా ఆయన మాట్లాడుతూ రాజీకి అర్హత కలిగి ఉన్న క్రిమినల్‌ కేసులు, సివిల్‌ కేసులు, ప్రిలిటిగేషన కేసులను ఈ జాతీయ లోక్‌ అదాలతలో పరిష్కరించుకోవచ్చని, కక్షిదారులు ఈ అవకాశాన్ని సద్వినియోగం చేసుకోవాలని ఆయన కోరారు. న్యాయాధికారి పి.జ్యోత్స్న దేవి మాట్లాడుతూ పోలీసు అధికారులు కక్షిదారులను సంప్రదించి వారిని రాజీ చేసి వీలైనన్ని ఎక్కువ కేసులు పోలీస్‌ స్టేషన్ల వారీగా పరిష్కారమయ్యేందుకు చొరవ తీసుకోవాలన్నారు. ఈ సమీక్షలో ఎక్సైజ్‌ కోర్టు మేజిస్ర్టేట్‌ ఎం.సరోజనమ్మ, పలువురు సీఐలు, ఎస్‌ఐలు పాల్గొన్నారు.