మరింత సులభంగా శ్రీవాణి దర్శన టికెట్లు

టీటీడీ అదనపు ఈవో వెంకయ్య చౌదరి

తిరుమల, నవంబరు13(ఆంధ్రజ్యోతి): తిరుమలలో ఆఫ్‌లైన్‌లో ఇచ్చే శ్రీవాణి దర్శన టికెట్ల కేటాయింపు ప్రక్రియను మరింత సులభతరం చేసినట్టు టీటీడీ అదనపు ఈవో వెంకయ్య చౌదరి తెలిపారు. గోకులం సమావేశ మందిరం వెనుక వైపు శ్రీవాణి దర్శన టికెట్ల నూతన కౌంటర్‌ను ఆయన బుధవారం ఉదయం ప్రారంభించారు. ప్రత్యేక పూజలు నిర్వహించిన అనంతరం స్వయంగా భక్తుల వద్ద వివరాలు తీసుకుని మొదటి టికెట్‌ను కేటాయించారు. ఈ సందర్భంగా ఆయన మీడియాతో మాట్లాడుతూ గతంలో ఉన్న శ్రీవాణి కౌంటర్‌ క్యూలైన్‌లో వర్షం పడినప్పుడు భక్తులు ఇబ్బంది పడటాన్ని గుర్తించి ప్రత్యేక కౌంటర్‌ను ఏర్పాటు చేశామన్నారు. శ్రీవాణి భక్తులు ఇకపై ఎలాంటి ఆసౌకర్యం లేకుండా టికెట్లు పొందవచ్చన్నారు. రోజుకు 900 టికెట్లు ఆఫ్‌లైన్‌ ద్వారా కేటాయిస్తున్నట్టు తెలిపారు. గతంలో టికెట్‌ కేటాయింపునకు 3 నుంచి 4 నిమిషాలు పట్టేదని, ప్రస్తుతం ఒక నిమిషంలో భక్తులకు టికెట్‌ కేటాయించేలా అప్లికేషన్‌లో మార్పులు చేసినట్టు వివరించారు. ఐదు కౌంటర్ల ద్వారా భక్తులు సులభతరంగా టికెట్లు కొనుగోలు చేయవచ్చని తెలిపారు.