ఇక కార్డ్‌ నెట్‌వర్క్‌ ఎంపిక

కస్టమర్‌ ఇష్టమే : ఆర్‌బీఐ

ముంబై: క్రెడిట్‌, డెబిట్‌ కార్డుల జారీకి సంబంధించి ఆర్‌బీఐ కీలక నిర్ణయం తీసుకుంది. అర్హులైన ఖాతాదారులకు వీటిని జారీ చేసేటపుడు, మాస్టర్‌ కార్డు, వీసా, రుపేలలో ఏ నెట్‌వర్క్‌ కార్డు తీసుకోవాలనే విషయాన్ని పూర్తిగా ఖాతాదారుల ఇష్టానికి వదిలేయాలని ఆర్‌బీఐ బ్యాంకులను ఆదేశించింది. ప్రస్తుతం ఈ విషయంలో ఖాతాదారులకు ఎటువంటి స్వేచ్చ లేదు. బ్యాంకులు ముందుగానే ఆయా నెట్‌వర్క్‌లతో ఒప్పందాలు కుదుర్చుకుని ఆయా నెట్‌వర్క్‌ల క్రెడిట్‌ లేదా డెబిట్‌ కార్డులను మాత్రమే ఖాతాదారులకు అంటగడుతున్నాయి. ఇక ముందు ఇలాంటి ముందస్తు ఒప్పందాలేవీ కుదరవని ఆర్‌బీఐ స్పష్టం చేసింది. ఏ నెట్‌వర్క్‌ క్రెడిట్‌ కార్డు లేదా డెబిట్‌ కార్డు తీసుకోవాలనేది ఇక పూర్తిగా ఖాతాదారుల ఇష్టమని తెలిపింది. ఇప్పటికే క్రెడిట్‌ లేదా డెబిట్‌ కార్డులున్న ఖాతాదారులు తదుపరి రెన్యూవల్‌ టైమ్‌లో తమకు ఇష్టమైన నెట్‌వర్క్‌ కార్డును ఎంచుకోవచ్చని పేర్కొంది. ఈ ఆదేశాలు జారీ అయిన ఆరు నెలల నుంచి అమల్లోకి వస్తాయని ఆర్‌బీఐ తెలిపింది.