యూపీఐ లావాదేవీల్లో 33 శాతం వృద్ధి

న్యూఢిల్లీ: ఈ ఏడాది సెమీ-అర్బన్‌, గ్రామీణ ప్రాంతాల్లోని చిల్లర విక్రయ కేంద్రాల వద్ద యూపీఐ ద్వారా చెల్లింపులు వార్షిక ప్రాతిపదికన 33 శాతం వృద్ధి చెందాయని డిజిటల్‌ నెట్‌వర్క్‌ ప్లాట్‌ఫామ్‌ పేనియర్‌బై తాజా రిపోర్టు వెల్లడించింది. దేశంలో డిజిటల్‌ చెల్లింపుల సాధనాల వినియోగం శరవేగంగా పెరుగుతోందనడానికిదే నిదర్శనమని నివేదికలో పేర్కొంది. అంతేకాదు, బీమా పాలసీల కొనుగోలు, ప్రీమియం చెల్లింపుల లావాదేవీల సంఖ్య 127 శాతం పెరిగిందని, కొత్త కస్టమర్లు 96 శాతం పెరిగారని తెలిపింది. గ్రామీణ, సెమీ-అర్బన్‌ ప్రాంతాల్లోని 10 లక్షల రిటైల్‌ కేంద్రాల వద్ద ఈ ఏడాది జనవరి-నవంబరులో జరిగిన లావాదేవీల అధ్యయనం ఆధారంగా ఈ నివేదికను రూపొందించినట్లు పేనియర్‌బై వెల్లడించింది. వ్యాపార రుణాలు, బంగారం తాకట్టు రుణా లు వంటి రుణాలు ఈ ఏడాదిలో 297 శాతం పెరిగాయని తెలిపింది.