Madhya Pradesh: మధ్యప్రదేశ్‌లో దారుణం.. గుడికి సమీపంలో భర్తను చెట్టుకు కట్టేసి..

భోపాల్: మధ్యప్రదేశ్‌లో రెండు దారుణమైన రేప్ ఘటనలు నమోదయ్యాయి. ఒకటి ఇండోర్‌లో జరగగా.. మరొకటి రెవా నగరంలో జరిగింది. రెవా అత్యాచార ఘటన ఆలయానికి సమీపంలో ఉన్న ఒక పిక్నిక్ స్పాట్‌లో జరిగింది. దంపతులకు అనూహ్య పరాభవం ఎదురైంది. భర్తను చెట్టుకు కట్టేసి భార్యపై దండుగులు సామూహిక అత్యాచారానికి పాల్పడ్డారు. ఈ దారుణాన్ని తమ సెల్‌ఫోన్లలో చిత్రీకరించారు. పోలీసులకు ఫిర్యాదు చేస్తే వీడియోను ఆన్‌లైన్‌లో పోస్ట్ చేస్తామని బెదిరించారు. అక్టోబర్ 21న జరిగిన ఈ దారుణ ఘటన తాజాగా వెలుగుచూసింది. కాగా బాధిత భార్యభర్తలు ఫిర్యాదు చేయడంతో పోలీసులు కేసు నమోదు చేశారు. అనుమానితుల్లో కొందర్ని అరెస్ట్ చేసినట్టు తెలిపారు.

ఇండోర్‌‌లో రోజు కూలీ దారుణం

ఇండోర్‌లో నరాల సమస్యలతో బాధపడుతున్న మహిళపై రోజుకూలి అత్యాచారానికి ఒడిగట్టాడు. మంగళవారం తెల్లవారుజామున 3.45 గంటల సమయంలో ఈ ఘటన జరిగింది. నగరంలోని సదర్ బజార్ ప్రాంతంలో ఓ మహిళ అర్ధనగ్నంగా, రక్తస్రావంతో తిరుగుతున్నట్లు సీసీటీవీ ఫుటేజీలో కనిపించింది. ఈ కేసులో మరింత పురోగతి కోసం పోలీసులు సీసీ ఫుటేజీని పరిశీలించారు. నిందితుడిని సోనూగా గుర్తించారు. అతడు ఒక కార్మికుడని తెలిపారు. ఘటన నమోదయిన గంటల వ్యవధిలోనే నిందితుడిని గుర్తించామని చెప్పారు. ఈ నేరాన్ని నిందితుడు సోనూ అంగీకరించినట్లు తెలిపారు.