అద్భుతమైన ముద్దు

ఓ నా ప్రియమైన సహ యాత్రికుడా

ఎడారిలో దప్పిగొన్న బాటసారినై

నేను నీ వలే, మృగతృష్ణ చెంత నిలిచి కనే

పగటికలలను నీ స్వప్నంలో దర్శించు

వీలైతే ఒక అద్భుతమైన

ప్రేమగల ముద్దును, జీవితేచ్ఛను

సుగంధ పుష్పాన్ని చేసి

నేను నిదురించే సమయాన

నా చెంత విడిచి వెళ్ళు

నా నుదుటిపై ప్రేమగా ముద్దుపెట్టు

వేదనామయ పురా జ్ఞాపకాల

మరుభూముల ఎడారైన నా శిరస్సుపై

హిమనదులు ప్రవహించి

కొత్త ఆశలు చిగురు వేస్తాయేమో

నా దిగులు కళ్లపై వెచ్చటి ముద్దుపెట్టు

లోలోన ఉప్పొంగే కన్నీటి సముద్రాలు

మాయమై, కాసిన్ని కమ్మటి కలల్ని

ప్రగాఢ సుఖ నిద్రను ఇవ్వగలదేమో

నా పెదవులపై ముద్దుపెట్టు

ఎన్నో మార్లు గాయపడి మౌనమై

మాయమైన నా మాటలు

ప్రణయపూరిత జీవ రహస్యాన్ని కనుగొని

చిరునవ్వై వెలుగుతాయేమో

నా అరచేతులపై ముద్దుపెట్టు

చిక్కుబడి, అగమ్యగోచరమైన

నా జీవన రేఖలను చెరిపివేసి

నీలాకాశాన్ని అందుకునే సత్తువగల

కొత్త రెక్కలు వికసిస్తాయేమో

నా పాదాలపై ముద్దుపెట్టు

నడచి నడచి అలసినా ఆగని

గమ్యరాహిత్యాపు పరుగులను వీడి

మరో అద్భుత సాహసోపేత

నూతన ప్రయాణానికి

దారులు కనుగొనగలవేమో

విమల