దేశం లోపల యుద్ధం

ఇప్పటికిప్పుడు

యుద్ధమేదీ లేనట్టే వుంటుంది

నీ వద్దా నా వద్దా

యుద్ధబీభత్స వాతావరణం

వ్యాపిస్తున్నట్టే కనిపించదు

ఒట్టిగానే నిరాలంకార ముఖాలతో

ఎవరి పుట్టల్లో వాళ్లు

తలలు దాచుకొని బతకడమే

వైచిత్రి-

ఇప్పటికిప్పుడు ఇక్కడ

మాటల్లో చేతల్లో

నిజాన్నే ప్రకటించే పిల్లలున్నారు

అబద్ధపు ప్రచారాలూ

ఢాంబిక ప్రదర్శనలూ

పిల్లల ముందు వృథా

దేశంలోపల

యుద్ధముందో లేదో

చెప్పే సాక్ష్యం

పిల్లలు-

దేశంలోపల

రగులుతున్న అరణ్యంలో

యుద్ధముంది

మూకుమ్మడిగా

పులులు వేటాడితే

చెదిరిన జింకల్లా ఆదివాసీలు

రగులుతున్న అరణ్యంలో

జింకలు విల్లమ్ములను ధరించి

ఎర్రటి నిప్పులను

వెదజల్లడమే చరిత్ర

ఎర్రటినిప్పుల పూలవనంలో

కర్కసబూటు ముద్రలు వేయాలనుకునే

నీ కల ఒట్టి కల మాత్రమే

ఒట్టి కల మాత్రమే-

దేశంలోపల యుద్ధముంది

సముద్రకల్లోలముంది

యుద్ధకల్లోల సందర్భంలో

లేతచూపులను వేకువలుగా పూయించే

పిల్లలున్నారు

ఏమీ తెలియనట్టే వుంటారు

అన్నీ తెలియజేస్తారు పిల్లలు

ఏదీ మాట్లాడనట్టే వుంటారు

అన్నీ మాట్లాడుతారు పిల్లలు

వీరులతో పాటూ పిల్లలూ

దేశంలోపల యుద్ధాన్ని

చిరునవ్వుతో ఓడించే ధీరులే-

మంగ్తు