వాహ్! ఉస్తాద్..!!
ABN , Publish Date - Dec 18 , 2024 | 02:10 AM
రెండు తబలాలపై వినసొంపుగా నాట్యమాడే ఆ వేళ్ల నెమళ్లు ఎగిసెగిసి పడే హోరుగా కంటికింపుగా కదిలే జులపాల కెరటాలు...
రెండు తబలాలపై
వినసొంపుగా
నాట్యమాడే ఆ వేళ్ల నెమళ్లు
ఎగిసెగిసి పడే హోరుగా
కంటికింపుగా
కదిలే జులపాల కెరటాలు
స్వరస్వర్గాలను
మనముందరే దించిన
జంత్రమాంత్రికుని
మూడు గుండెలు
మూగవోయినా
సుస్వరయాత్ర
సాగుతూనే ఉంది.
కవీ! ఎందుకా వ్యర్థప్రయత్నం
ఆ శబ్ద ఝరీగమనంలో
నీ మాటల ముఖాలు
చూసుకోవాలని
అజరామరమైన
ఆ నెమళ్లింకా
తబలాలపై
కనులముందు
ఆడుతూనే ఉన్నాయి
అశ్రువులు
వాహ్ ఉస్తాద్.. అల్విదా
అని చెబుతున్నా
చెవులింకా...
అబద్ధమనే అంటున్నాయి.
మడిపల్లి రాజ్‌కుమార్
