Tokyo Sankranti: టోక్యోలో ఘనంగా సంక్రాంతి సంబరాలు

హైదరాబాద్: తెలుగు అసోసియేషన్ ఆఫ్ జపాన్ (తాజ్) ఆధ్వర్యంలో టోక్యోలో సంక్రాంతి వేడుకలు ఘనంగా నిర్వహించారు. టోక్యోలోని తెలుగువారంతా కలిసి ఈ సంబరాలు జరుపుకున్నారు. ఈ సందర్భంగా మహిళలకు నిర్వహించిన ముగ్గుల పోటీలు, యువకులకు గాలిపటాల పోటీలు విశేషంగా ఆకట్టుకున్నాయి. అలాగే.. టోక్యో ఆడిటోరియంలో చిన్నారులు నిర్వహించిన సాంస్కృతిక కార్యక్రమాలు, తెలుగు పాటలకు జపాన్ యువత చేసిన డ్యాన్స్ ఆహుతులను మంత్రముగ్ధులను చేసింది. స్వేదేశానికి దూరంగా ఉన్నప్పటికీ.. తెలుగు సంస్కృతి సంప్రదాయాలకు దగ్గరగా ఉండాలన్న ఉద్దేశంతో ప్రతి ఏటా సంక్రాంతి, ఉగాది, దీపావళి, దసరా వేడుకలు టోక్యోలో ఘనంగా నిర్వహించుకుంటున్నామని తెలుగు అసోసియేషన్ ఆఫ్ జపాన్ ప్రతినిధులు తెలిపారు.