శ్రీలంకతో 3 వన్డేలు, 3 టీ20లు

న్యూఢిల్లీ: కొత్త కోచ్‌ గౌతమ్‌ గంభీర్‌ ఆధ్వర్యంలో భారత జట్టు ఈనెలాఖరున శ్రీలంకతో పరిమిత ఓవర్ల సిరీస్‌ ఆడనుంది. ముందుగా పల్లెకెలెలో 26, 27, 29న టీ20 సిరీస్‌.. ఆ తర్వాత కొలంబో వేదికగా ఆగస్టు 1, 4, 7న ఇరు జట్ల మధ్య మూడు వన్డేల సిరీస్‌ జరుగనుంది. సరిగ్గా మూడేళ్ల క్రితం భారత జట్టు లంకలో పర్యటించింది. మరోవైపు ఈ సిరీ్‌సకు కెప్టెన్‌ రోహిత్‌, విరాట్‌, బుమ్రా విశ్రాంతి తీసుకోనున్నట్టు సమాచారం.

టీ20 కెప్టెన్సీకి హసరంగ గుడ్‌ బై: శ్రీలంక టీ20 జట్టు కెప్టెన్సీనుంచి వనిందు హసరంగ గురువారం వైదొలిగాడు. భారత్‌తో సిరీస్‌ ఆడనున్న తరుణంలో హసరంగ ఈ నిర్ణయం తీసుకోవడం గమనార్హం. జట్టు ప్రయోజనాల రీత్యా కెప్టెన్సీ నుంచి వైదొలగి కేవలం ఆటగాడిగా కొనసాగాలని హసరంగ నిర్ణయించుకున్నట్టు శ్రీలంక క్రికెట్‌ తెలిపింది. హసరంగ నాయకత్వంలో ఇటీవలి టీ20 ప్రపంచ కప్‌లో తలపడిన శ్రీలంక సూపర్‌-8 దశకు కూడా చేరని విషయం తెలిసిందే.