MS Dhoni: ధోనీ అలా కన్ఫ్యూజ్ చేశాడేంటి? తీవ్ర చర్చనీయాంశంగా మారిన చెన్నై కెప్టెన్ పోస్ట్!

అంతర్జాతీయ క్రికెట్‌కు వీడ్కోలు పలికిన టీమిండియా మాజీ కెప్టెన్ మహేంద్ర సింగ్ ధోనీ (MS Dhoni) ఐపీఎల్‌లో మాత్రం కొనసాగుతున్నాడు. గతేడాది ఐపీఎల్ ముగిసిన వెంటనే రిటైర్మెంట్ (MS Dhoni Retirement) ప్రకటిస్తాడని అందరూ అనుకున్నారు. అయితే ధోనీ నుంచి అలాంటి ప్రకటనేం రాలేదు. దీంతో ఈ సీజన్‌లో (IPL 2024) కూడా ధోనీ చెన్నై టీమ్‌ను (CSK) నడిపిస్తాడని అందరూ అనుకుంటున్నారు. అయితే తాజాగా ధోనీ సోషల్ మీడియాలో చేసిన ఓ పోస్ట్ చాలా అయోమయానికి కారణమవుతోంది.

ఐపీఎల్ 2024 ప్రారంభోత్సవానికి ముందు ధోనీ సోషల్ మీడియా వేదికగా ఓ ఆసక్తికర పోస్ట్ చేశాడు. ``కొత్త సీజన్, కొత్త రోల్ కోసం ఆసక్తిగా ఎదురు చూస్తున్నా.. వేచి ఉండండి`` అంటూ ఫేస్‌బుక్ వేదికగా పోస్ట్ చేశాడు. సాధారణంగా సోషల్ మీడియాకు దూరంగా ఉండే ధోనీ ఈ కీలక తరుణంలో చేసిన ఈ పోస్ట్ చర్చనీయాంశంగా మారింది. రకరకాల ఊహాగానాలకు ఈ పోస్ట్ కారణమవుతోంది. ఈ సీజన్‌లో ధోనీ కోచ్ పాత్రకు పరిమితం కాబోతున్నాడని కొందరు ఊహిస్తున్నారు.

ధోనీ మాత్రమే కాదు.. చైన్నై సూపర్ కింగ్స్ యాజమాన్యం కూడా ఓ ట్వీట్ చేసి సస్పెన్స్‌ను మరింత పెంచింది. ``కొత్త పాత్రలో లియో`` అంటూ ఓ ట్వీట్ చేసింది. మొత్తానికి ధోనీ, సీఎస్కే చేసిన పోస్ట్‌లు అభిమానుల్లో ఉత్సుకతను రేకెత్తిస్తున్నాయి. గతేడాది ఐపీఎల్ ఛాంపియన్‌గా నిలిచిన చెన్నై టీమ్ ఈ సీజన్‌లో జరిగే తొలి మ్యచ్‌లోనే బరిలోకి దిగనుంది. మార్చి 22వ తేదీన ఆర్సీబీతో తలపడనుంది.