Tilak Varma: అప్పుడు మేమంతా తీవ్ర నిరాశకు లోనయ్యాం.. ఆంధ్రజ్యోతి ఇంటర్వ్యూలో కీలక విషయాలు వెల్లడించిన టీమిండియా క్రికెటర్

నిరుడు ఐపీఎల్‌లో ముంబై ఇండియన్స్‌ తరఫున ధనాధన్‌ బ్యాటింగ్‌తో దేశ వ్యాప్తంగా క్రేజ్‌ దక్కించుకున్న తిలక్‌ వర్మ అంతర్జాతీయ క్రికెట్‌లోనూ సత్తా చాటుతున్నాడు. దేశం తరపున టెస్టు క్రికెట్‌ ఆడేందుకు ఉవ్విళ్లూరుతున్నానని, అదే జరిగితే తన కల సాకారం అయినట్టేనని చెబుతున్న తిలక్‌ వర్మ ప్రస్తుతం రంజీల్లో బిజీగా ఉన్నాడు. అవమానకర రీతిలో ప్లేట్‌ స్థాయికి దిగజారిన హైదరాబాద్‌ను తన కెప్టెన్సీలో మళ్లీ ఎలిట్‌ స్థాయికి తీసుకెళ్లిన తిలక్‌.. జట్టుకు రంజీ ట్రోఫీని సైతం అందిస్తానని ఆంధ్రజ్యోతికి ఇచ్చిన ఇంటర్వ్యూలో తెలిపాడు. తిలక్‌ ఇంకా ఏమన్నాడో అతని మాటల్లోనే తెలుసుకుందాం..

(ఆంధ్రజ్యోతి క్రీడాప్రతినిధి-హైదరాబాద్‌)

ఎందరో దిగ్గజ క్రికెటర్లు ప్రాతినిధ్యం వహించిన హైదరాబాద్‌ జట్టు రంజీ ట్రోఫీ ఎలిట్‌ గ్రూప్‌లో స్థానం కోల్పోయినప్పుడు నాతో పాటు జట్టులోని అందరం తీవ్ర నిరాశకు లోనయ్యాం. ప్లేట్‌ గ్రూప్‌లోని జట్లతో ఏ విధంగా ఆడాలనే దానిపై రంజీ ట్రోఫీ ప్రారంభానికి ముందు చర్చించుకున్నాం. కేవలం విజయాలు సాధిస్తే సరిపోదు, ప్రతి మ్యాచ్‌లోనూ మన జట్టులో వచ్చిన మార్పును ప్రస్ఫుటంగా తెలియజేయాలనుకున్నాం. దీనిని ఒక సవాల్‌గా తీసుకొని బ్యాటింగ్‌, బౌలింగ్‌, ఫీల్డింగ్‌ మూడింట్లోనూ మా అత్యుత్తమ ఆటను ప్రదర్శించాం. ఆడిన ఐదు మ్యాచ్‌ల్లోనూ 2-3 రోజుల్లోనే విజయం సాధించాం. రంజీ ప్లేట్‌ గ్రూప్‌ ఫైనల్లో గెలిచాక హైదరాబాద్‌ కథ మారనుంది. జట్టుకు రంజీ ట్రోఫీని అందించేదాకా విశ్రమించను.

టెస్టులు ఆడేందుకు ఎదురు చూస్తున్నా..

రెడ్‌బాల్‌ ఫార్మాట్‌ అంటే బాగా ఇష్టం. ఇందులో రాణించడంతోనే నాకు టీ20, వన్డే ఫార్మాట్లలో అవకాశాలు దక్కాయి. రెడ్‌ బాల్‌ ఫార్మాట్‌లో ప్రస్తుతం మంచి స్కోర్లు సాధిస్తున్నా. ఇలాగే నిలకడగా రాణిస్తే త్వరలో భారత టెస్టు జట్టులోను స్థానం లభించ వచ్చు. వైట్‌ జెర్సీ వేసుకునేందుకు ఆత్రుతగా ఎదురు చూస్తున్నా. టెస్టు జట్టులో అవకాశం వస్తే నాకల సాకారమైనట్టే. ఆ అవకాశం వచ్చే వరకు తీవ్రంగా శ్రమిస్తా.

ముంబై ఫార్ములా..

వేలాది మంది అభిమానుల కోలాహలం నడుమ, కిక్కిరిసిన స్టేడియాల్లో, ఐపీఎల్‌ మ్యాచుల్లో ఆడడం భిన్నమైన అనుభూతి. అలాంటి సమయాల్లో ఒత్తిడికి లోనుకాకుండా ఎలా ఆడాలో ముంబై ఇండియన్స్‌ డ్రెస్సింగ్‌ రూమ్‌లో పాఠాలు నేర్చుకున్నా. ఆటలో జట్టు క్లిష్టమైన పరిస్థితిలో ఉన్నప్పుడు సమష్టిగా ఎలాంటి వ్యూహాలు అమలు చేయాలి, ప్రత్యర్థిపై ఎలా పైచేయి సాధించాలనే విషయాల్లో నేను గడించిన అనుభవాన్ని ఇప్పుడు హైదరాబాద్‌ జట్టుకు ఉపయోగిస్తున్నా. అవి సత్ఫలితాలను ఇస్తున్నాయి.