మూడున్నర తులాల పుస్తెలతాడు అపహరణ
ABN , Publish Date - Jan 11 , 2024 | 12:22 AM
పొలం వద్ద ఉన్న ఓ మహిళ మెడలో నుంచి మూడున్నర తులాల పస్తెలతాడు, సెల్‌ఫోన్‌ను దుండగులు అపహరించిన ఘటన బుధవారం మండల పరిధిలోని కొత్త ఆగిర్యాలలో జరిగింది. ఎస్సై కృష్ణ కథనం మేరకు.
కొందుర్గు, జనవరి 10: పొలం వద్ద ఉన్న ఓ మహిళ మెడలో నుంచి మూడున్నర తులాల పస్తెలతాడు, సెల్‌ఫోన్‌ను దుండగులు అపహరించిన ఘటన బుధవారం మండల పరిధిలోని కొత్త ఆగిర్యాలలో జరిగింది. ఎస్సై కృష్ణ కథనం మేరకు.. కొత్త ఆగిర్యాలకు చెందిన మంచమోని దేవమ్మ సపోట తోట వద్దకు 25 ఏళ్ల వయస్సు గల ఇద్దరు యువకులు బైక్‌పూ వచ్చారు. ఒకతను మోటర్‌ సైకిల్‌పై నవాబ్‌పేట వైపు నిలబడి ఉన్నాడు. మరొకరు దేవమ్మ దగ్గరకు వెళ్లి కుర్వ మల్లయ్య వ్యవసాయ భూమి ఎక్కడ ఉందని అడిగాడు. మల్లయ్య భూమి ఇక్కడ లేదని చెప్పడంతో, సపోటా పండ్లు కావాలని అడిగి, ఆమె చుట్టూ తిరిగి మెడలో ఉన్న మూడున్నర తులాల పుస్తెలతాడు, సెల్‌ఫోన్‌ను లాక్కుని, మోటర్‌ సైకిల్‌పై నవాబ్‌పేట్‌ వైపు వేగంగా వెళ్లినట్లు ఎస్సై తెలిపారు. సంఘటన స్థలాన్ని షాద్‌నగర్‌ ఏసీపీ రంగస్వామి, డీఐ రాంరెడ్డి సందర్శించి వివరాలను తెలుసుకున్నారు. బాధితురాలి ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్సై తెలిపారు.
