విద్యార్థులు చదువులకే పరిమితం కావొద్దు

మేడ్చల్‌ టౌన్‌, జనవరి 28: విద్యార్థులు చదువుకే పరిమితం కావొద్దని సాంస్కృతిక కార్యక్రమాలు, క్రీడల్లో అభిరుచి పెంచుకోవాలని ప్రముఖ సినీ డైరెక్టర్‌, స్ర్కిప్ట్‌రైటర్‌ ప్రశాంత్‌వర్మ అన్నారు. మేడ్చల్‌ పట్టణం అత్వెల్లి విజ్ఞాన్‌ గ్లోబాల్‌ జైన్‌ పాఠశాలలో శనివారం రాత్రి వార్షికోత్సవ వేడుకలు నిర్వహించారు. కార్యక్రమానికి ముఖ్య అతిథిగా విచ్చేసిన ప్రశాంత్‌ విద్యార్థులనుద్దేశించి మాట్లాడుతూ.. విద్యార్థులు చదువులతో పాటు ఇతర రంగాలపై ఆసక్తి కనపరచాలన్నారు. అన్నిరంగాలపై అవగాహన కలిగి ఉన్నప్పుడే వారు జీవితంలో ఉన్నతస్థాయికి ఎదుగుతారని అన్నారు. ఇలాంటి సాంస్కృతిక కార్యక్రమాలతో విద్యార్థుల్లో నాయకత్వ లక్షణాలు పెరుగుతాయన్నారు. ఈ కార్యక్రమంలో భాగంగా విద్యార్థులు పలు సాంస్కృతిక కార్యక్రమాలతో అలరించారు. ఆటల పోటీల్లో విజేతలుగా నిలిచిన విద్యార్థులతో పాటు, పలు అంశాల్లో ప్రతిభ కనబర్చిన విద్యార్థులకు బహుమతులు అందజేశారు. ఈ కార్యక్రమంలో పాఠశాల వైస్‌చైర్మన్‌ రాణి రుద్రమ దేవి, పాఠశాల హ హెచ్‌ఎం జయరాజ్‌ తదితరులు పాల్గొన్నారు.