Candidates: గ్రూప్‌-4 సర్టిఫికెట్‌ వెరిఫికేషన్‌.. మరో 15 మందికి టీజీపీఎస్సీ చాన్స్‌

హైదరాబాద్‌, నవంబరు 3 (ఆంధ్రజ్యోతి): గ్రూప్‌-4 కొలువుల భర్తీలో భాగంగా మరో 15 మంది అభ్యర్థులను సర్టిఫికెట్‌ వెరిఫికేషన్‌కు ఆహ్వానిస్తున్నట్లు తెలంగాణ పబ్లిక్‌ సర్వీస్‌ కమిషన్‌ ఆదివారం విడుదల చేసిన వెబ్‌నోట్‌లో పేర్కొంది. స్పోర్ట్స్‌ కోటాలో షార్ట్‌ఫాల్‌ను భర్తీ చేసేందుకు ఈ నిర్ణయం తీసుకున్నట్లు వివరించింది. వీరిని 1:5 నిష్పత్తిలో సర్టిఫికెట్‌ వెరిఫికేషన్‌కు పిలుస్తున్నట్లు పేర్కొంది. వెబ్‌నోట్‌లో సూచించిన అభ్యర్థులు వెబ్‌ఆప్షన్‌ ఇచ్చేందుకు మంగళవారం దాకా గడువు ఇచ్చామని, వారంతా సోమవారం 10 గంటల నుంచి నాంపల్లిలోని తెలుగు విశ్వవిద్యాలయంలో నిర్వహించే సర్టిఫికెట్‌ వెరిఫికేషన్‌కు హాజరు కావాలని సూచించింది.

అయితే.. వెరిఫికేషన్‌కు ఒక్కరోజు ముందు వెబ్‌నోట్‌ ఇస్తే.. అభ్యర్థులు ఫిజికల్‌ ఫిట్‌నెస్‌ సర్టిఫికెట్‌, స్థానికతపై బోనఫైడ్‌ లేకుంటే.. తహసీల్దార్‌ సర్టిఫికెట్‌, గెజిటెడ్‌ అధికారి సంతకం.. ఇతర పత్రాలను తీసుకునేందుకు సమయం సరిపోతుందా? అనే అనుమానాలు వ్యక్తమవుతున్నాయి.