వావ్‌.. వైశాలి

అజేయంగా క్వార్టర్స్‌లోకి

అర్జున్‌, ప్రజ్ఞానంద, హంపిలకు నిరాశ

వరల్డ్‌ బ్లిట్జ్‌ చెస్‌

న్యూయార్క్‌: ప్రపంచ బ్లిట్జ్‌ చెస్‌ చాంపియన్‌షి్‌ప మహిళల విభాగంలో భారత గ్రాండ్‌మాస్టర్‌ ఆర్‌.వైశాలి అదరగొడుతోంది. అనూహ్య ఆటతీరుతో అజేయంగా దూసుకెళ్తున్న ఈ తమిళనాడు క్రీడాకారిణి 9.5 పాయింట్లతో క్వార్టర్‌ఫైనల్స్‌కు చేరుకుంది. దీంతో తాజా టోర్నీలో నాకౌట్‌లో అడుగుపెట్టిన ఏకైక భారత ప్లేయర్‌గా నిలిచిన వైశాలి.. 2024లో గుకేశ్‌, హంపి తర్వాత మరో వరల్డ్‌ చాంపియన్‌గా రికార్డులకెక్కాలనుకుంటోంది. తొలి దశలో ఆడిన 11 రౌండ్లలో 8 విజయాలు, మూడు డ్రాలతో వైశాలి టాప్‌లో ఉంది. సెమీ్‌సలో చోటు కోసం 23 ఏళ్ల వైశాలి ఝు జినెర్‌ (చైనా)తో తలపడనుంది. టోర్నీలో వైశాలి మినహా భారత ఆటగాళ్ల పోరాటం ముగిసింది. టాప్‌-8 మాత్రమే క్వార్టర్స్‌కు వెళ్లనుండగా, 8 పాయింట్లతో హంపి తొమ్మిదో స్థానంలో నిలిచింది. దివ్య, వంతిక కూడా నిరాశపరిచారు.

ఇక ఓపెన్‌ విభాగంలోనూ వైశాలి సోదరుడు ప్రజ్ఞానంద (8.5) 23వ స్థానంలో, అర్జున్‌ ఇరిగేసి (7) 64వ స్థానంలో, ప్రణవ్‌ (7) 67వ స్థానంలో నిలిచి నిష్క్రమించారు.