మేం ఎలాంటి చట్ట వ్యతిరేక నిర్ణయం తీసుకోలేదు: పేర్ని నాని

అమరావతి: తాము ఎలాంటి చట్ట వ్యతిరేక నిర్ణయం తీసుకోలేదని మంత్రి పేర్ని నాని తెలిపారు. సోమవారం ఆయన మీడియాతో మాట్లాడుతూ చట్టంలోని విషయాలను దర్శకుడు ఆర్జీవీకి వివరించానని తెలిపారు. చట్టాన్ని అందరూ గౌరవించాల్సిందేనన్నారు. మంగళవారం కమిటీ సమావేశం ఉందని, మంచి సలహాలు, సూచనలు ఎవరు చేసినా స్వీకరిస్తామని ప్రకటించారు. రాష్ట్ర ప్రభుత్వం ఎవరినీ ఇబ్బందిపెట్టలేదని పేర్ని నాని తెలిపారు. 

సినిమా టికెట్‌ ధరల వ్యవహారంపై చర్చించేందుకు రావల్సిందిగా పేర్ని నాని రామ్‌గోపాలవర్మను ఆహ్వానించారు. ఇందులోభాగంగా సోమవారం మధ్యాహ్నం అమరావతి సచివాలయంలో భేటీ అయ్యారు. ఏపీలో టికెట్‌ ధరలు తగ్గించడంపై వర్మ స్పందిస్తూ జగన్‌ ప్రభుత్వంపై, మంత్రుల తీరుపై ఘాటైన విమర్శలు చేశారు. పది ప్రశ్నలు సంధిస్తూ.. వాటికి సమాధానం చెప్పాలని  కోరుతూ ఓ వీడియోను విడుదల చేశారు. ప్రభుత్వంతో ఎప్పుడైనా, ఎక్కడైనా చర్చకు సిద్ధమే అని సవాల్‌ విసిరారు. ప్రభుత్వంతో గొడవ పడటం తన ఉద్దేశం కాదని, అవకాశం ఇస్తే కలుస్తానని వర్మ పేర్కొన్నారు. దీనిపై మంత్రి నాని కూడా ప్రతిస్పందిస్తూ ‘త్వరలో కలుద్దాం’ అని ట్వీట్‌ చేశారు. ఈ నేపథ్యంలో వర్మతో చర్చలు జరిపేందుకు మంత్రి సమయాన్ని కేటాయించారు.