ఐఎంఇఐ నెంబర్‌తో పోన్‌ పట్టుకోవచ్చా?

ఐఎంఇఐ నెంబర్‌  జాగ్రత్తగా పెట్టి ఉంటే ఫోన్‌ పోయినా  సులభంగా వెతికి పట్టుకోవచ్చు అంటుంటారు.  ఇది నిజమేనా? 

-  కార్తీక్‌, వరంగల్‌

కేవలం ఒక్క ఐఎంఇఐ  నెంబర్‌ ఆధారంగా ఫోన్‌ ఎక్కడ ఉందో వెతికి పట్టుకోవటం చాలా కష్టం.   ఒక ఫోన్‌ ఏదైనా మొబైల్‌ టవర్‌కి కనెక్టయ్యే ప్రయత్నంలో భాగంగా దాని ఐఎంఇఐ నెంబర్‌ని కూడా టెలికం కంపెనీకి  ప్రసారం చేస్తూ ఉంటుంది.  ఈ నేపథ్యంలో ఒక మొబైల్‌ ఫోన్‌ ప్రస్తుతం ఏ టవర్‌ లొకేషన్‌లో ఉందన్న   సమాచారం సెల్‌ఫోన్‌ కంపెనీల వద్ద ఉంటుంది.  అయితే గూగుల్‌ మ్యాప్స్‌లో  నిక్కచ్చిగా ఒక వ్యక్తి   సమాచారం కనిపించినట్లు సెల్‌ టవర్‌ డేటా అనేది అలా పిన్‌ పాయింటెడ్‌గా ఉండదు.  కనీసం రెండు కిలోమీటర్ల వ్యాసార్థంలో ఆ మనిషి ఎక్కడైనా ఉండొచ్చు.

అదీ కూడా  ఏదైనా పోలీస్‌ కేస్‌ అయినప్పుడు మాత్రమే పోలీసు శాఖ నుంచి వచ్చిన రిక్వె్‌స్టని  ఆధారంగా చేసుకొని టెలికం కంపెనీలు ఈ సమాచారాన్ని అందిస్తూ ఉంటాయి. చాలా మంది ఫోన్‌ పోగొట్టుకొని  పోలీస్‌ కేసు పెడితే అది దొరుకుతుందన్న భ్రమలో ఉంటుంటారు.  ప్రతి ఊళ్లోనూ రోజుకి కొన్ని వందల ఫోన్లు చోరీకి గురవుతుంటాయి.  ఈ నేపథ్యంలో పోలీసు శాఖపై ఇతర కేసుల విషయంలో ఉన్న ఒత్తిడి కొద్దీ  పోయిన ఫోన్‌లు తిరిగి వచ్చే అవకాశాలు చాలా తక్కువ.  కాబట్టి మీ ఫోన్‌ లో ఏదైనా ఏంటీ-థెటప్ట్‌  అప్లికేషన్‌ను ఇన్‌స్టాల్‌  చేసుకోవడం తప్పించి  కేవలం ఐఎంఇఐ  నెంబర్‌పై  ఆధారపడకండి.