CI కుటుంబానికి రూ. 25 లక్షల సాయం
ABN , First Publish Date - 2022-09-16T12:07:41+05:30 IST
గుండె పోటుతో మృతిచెందిన ఓ సీఐ కుటుంబానికి ఆయన బ్యాచ్‌కు చెందిన సీఐలు, డీఎస్పీలు 25 లక్షల రూపాయల ఆర్థిక సాయాన్ని అందించారు...
Tirupati: గుండె పోటుతో మృతిచెందిన ఓ సీఐ కుటుంబానికి(CI Family) ఆయన బ్యాచ్‌కు చెందిన సీఐలు, డీఎస్పీలు 25 లక్షల రూపాయల ఆర్థిక సాయాన్ని(Financial assistance) అందించారు. తెలంగాణ రాష్ట్రం, ఖమ్మం జిల్లా బోనకల్‌ మండలం చిన్నబీరవెల్లికి చెందిన వై. రమేష్బాబు 1996 బ్యాచ్‌లో ఎస్‌ఐగా ఎపింకయ్యారు. కుటుంబంతో హైదరాబాద్‌ ఉప్పల్‌లో స్థిరపడ్డారు. గత ఏడాదినుంచి ఆదిలాబాద్‌ జిల్లా, ఇచ్చోడ పోలీస్‌ స్టేషన్‌ సర్కిల్‌ ఇన్‌స్పెక్టర్‌గా పనిచేస్తున్న ఆయన కొంతకాలంగా జీర్ణాశయ సమస్యలతో బాధపడుతున్నారు. వారం రోజులక్రితం హైదరాబాద్‌లోని ఓ ప్రైవేటు ఆసుపత్రిలో శస్త్రచికిత్స చేయించుకున్నారు. అనంతరం ఆసుపత్రిలో ఉండగానే గుండెపోటుకు గురైన ఆయన మంగళవారం మృతిచెందారు.ఉప్పల్‌లో బుధవారం అంత్యక్రియలు నిర్వహించారు. ఈ సందర్భంగా తెలంగాణ, ఆంధ్రప్రదేశ్‌లోని వివిధ ప్రదేశాల్లో సీఐలు, డీఎస్పీలుగా పనిచేస్తున్న రమేష్బాబు బ్యాచ్‌కు చెందిన పోలీసు అధికారులు రూ. 25,00,116 చెక్కును ఆయన కుటుంబ సభ్యులకు అందజేసి ఏ అవసరం వచ్చినా తామున్నామంటూ ధైర్యం చెప్పారు.
