కరోనాతో మహిళలకు ప్రమాదం తక్కువ

పురుషులు, స్త్రీల విషయంలో కరోనా వైరస్‌ వ్యాప్తి, మరణాలకు సంబంధించి వ్యత్యాసాలు ఏమైనా ఉన్నాయా? ఇప్పటివరకు ప్రపంచవ్యాప్తంగా కరోనా బాధితుల సంఖ్యను విశ్లేషిస్తే పురుషుల కంటే మహిళల్లో కరోనా బారినపడేవారి సంఖ్య తక్కువగా ఉన్నట్టు గణాంకాలు చెబుతున్నాయి. కరోనా వచ్చిన తొలిదేశం చైనాలో మొత్తం మరణాల్లో 2.8 శాతం మంది పురుషులుంటే, మహిళలు 1.7 శాతం మాత్రమే ఉన్నారు. కరోనా వల్ల విలవిల్లాడుతున్న ఇటలీ, స్పెయిన్‌, జర్మనీ, ఫ్రాన్స్‌, ఇరాన్‌, దక్షిణ కొరియా దేశాల్లో కూడా ఇదే ధోరణిలో కరోనా వ్యాప్తి, మరణాలు నమోదవుతున్నాయి. ఇటలీలో అయితే మొత్తం కరోనా మృతుల్లో 71 శాతం మంది పురుషులున్నారు. స్పెయిన్‌లో కూడా మొత్తం కరోనా బాధితుల్లో పురుషులతో పోల్చుకుంటే మహిళల సంఖ్య సగం కంటే తక్కువగా ఉంది. 

ఈ వ్యత్యాసానికి కారణం ఏమిటనేది శాస్త్రవేత్తలు ఎవరూ కచ్చితంగా నిర్ధారించలేకపోతున్నారు. పురుషుల్లో పొగతాగే అలవాటు ఎక్కువగా ఉండటం వారిలో అధిక మరణాలరేటుకు కారణమై ఉండొచ్చని విశ్లేషిస్తున్నారు. ఉదాహరణకు చైనాలో పురుషుల్లో 50 శాతం పొగతాగేవారుంటే, మహిళల్లో 2 శాతం మాత్రమే ఈ అలవాటు ఉంది. దీనివల్ల హృద్రోగ సంబంధ సమస్యలు సహజంగానే మహిళల్లో తక్కువగా ఉండే అవకాశం ఉంది. అంతేగాక పొగతాగేవారు తరచుగా పెదాలను తాకుతుంటారు. దీనివల్ల కరోనా వ్యాప్తించే అవకాశాలు ఎక్కువ. ఇది కూడా మహిళల్లో కరోనా వ్యాప్తి తక్కువగా ఉండటానికి దోహదం చేస్తోందని భావిస్తున్నారు. దీంతోపాటు పరిశుభ్రత, వైద్యుల సూచనలు, ఇతరత్రా జాగ్రత్తలు పాటించడంలో కూడా పురుషుల కంటే మహిళలు ఎక్కువ శ్రద్ధ తీసుకోవడం కూడా కారణమై ఉండొచ్చని నిపుణుల అభిప్రాయం.