Good News: భారీగా తగ్గిన tomato ధరలు
ABN , First Publish Date - 2021-11-27T20:06:46+05:30 IST
టమోటా కొనాలంటేనే భయపడిపోతున్న సామాన్య ప్రజలకు నిజంగా ఇది శుభవార్త. నిన్న మొన్నటి వరకు వంద రూపాయలకు పైగా ధర పలికిన టమోటా ఒక్కసారిగా పడిపోయింది.
కర్నూలు: టమోటా కొనాలంటేనే భయపడిపోతున్న సామాన్య ప్రజలకు నిజంగా ఇది శుభవార్త. నిన్న మొన్నటి వరకు వంద రూపాయలకు పైగా ధర పలికిన టమోటా ఒక్కసారిగా పడిపోయింది. కర్నూలు జిల్లాలోని పత్తికొండ వ్యవసాయ మార్కెట్లో శనివారం టమోటా ధర గరిష్టంగా రూ. 27 పలకగా, కనిష్టంగా రూ. 10 పలకడం విశేషం. ఒక్కసారిగా టమోటా ధరలు భారీగా తగ్గడంతో వినియోగదారులు ఆనందం వ్యక్తం చేస్తున్నారు. అయితే రైతులు మాత్రం తీవ్ర ఆందోళన చెందుతున్నారు. ప్రస్తుత ధరలకు రవాణా ఖర్చులు కూడా రావడం కష్టమేనని చెబుతున్నారు. మధ్యప్రదేశ్, మహారాష్ట్ర, తెలంగాణ రాష్ట్రాల నుంచి టమోటా దిగుమతి కావడం వల్ల ధరలు తగ్గాయని పత్తికొండ వ్యాపారులు చెబుతున్నారు. అయితే కర్నూలు జిల్లాలోని పలు మార్కెట్లలో టమోటా ధర రూ. 50కిపైగానే పలుకుతోంది. కానీ పత్తికొండ మార్కెట్ యార్డులో ఊహించని విధంగా ధరలు తగ్గడంపై అనుమానాలు వ్యక్తమవుతున్నాయి. వ్యాపారులు పత్తికొండలో ధరలు తగ్గించి ఇతర ప్రాంతాల్లో అధిక రేట్లకు అమ్ముకునేందుకు పన్నాగం పన్నినట్లు రైతులు అనుమానం వ్యక్తం చేస్తున్నారు.