కాలగర్భంలో కారాగారం!

వరంగల్‌జైలు నేలమట్టం.. భూమి వైద్య శాఖకు అప్పగింత

వరంగల్‌ అర్బన్‌ క్రైం, జూన్‌ 13: వరంగల్‌ కేంద్ర కారాగారం.. కాలగర్భంలో కలిసిపోయింది! 135 ఏళ్ల చరిత్ర కలిగిన జైలు గోడలు కూలిపోయాయి! సెంట్రల్‌ జైలు పూర్తిగా కనుమరుగైంది. సూపర్‌ స్పెషాలిటీ ఆస్పత్రి కోసం వరంగల్‌ కేంద్ర కారాగారాన్ని తరలిస్తున్నట్లు ప్రభుత్వం ప్రకటించింది. గత కొన్ని రోజుల నుంచి ఖైదీలను, సామగ్రిని తరలించారు. శనివారం నుంచి భారీ భద్రత నడుమ జైలు భవనాల కూల్చివేతను చేపట్టారు. ఆదివారం పూర్తి స్థాయిలో నేలమట్టం చేశారు. దేశంలోనే అత్యాధునిక, పటిష్ఠ భద్రతతో నిర్మించిన కారాగారాల్లో వరంగల్‌ సెంట్రల్‌ జైలు ముందు వరుసలో ఉంటుంది. 6వ నిజాం మీర్‌ మహబూబ్‌ అలీ ఖాన్‌ పాలనలో 1886లో హన్కిన్‌ అనే అధికారి ఈ జైలు నిర్మాణాన్ని చేపట్టారు. పీపుల్స్‌వార్‌ వ్యవస్థాపకులైన కాసు సన్యాల్‌, కాళోజీ, దాశరథి, మావోయిస్టు అగ్రనేత గణపతి లాంటి ఎందరినో ఈ జైల్లో ఉంచారు. వరంగల్‌ జైలు కూల్చివేత ప్రక్రియను భారీ బందోబస్తు నడుమ చేపట్టారు. జైలు కూల్చివేస్తే రోడ్డుపై ట్రాఫిక్‌ ఆంక్షలు ఎందుకని స్థానికులు మండిపడ్డారు.