దిండుతో కండరాలకు...

ఆంధ్రజ్యోతి(21-05-2020):

కసరత్తులు చేయాలంటే జిమ్‌ పరికరాలే ఉండనక్కర్లేదు. దిండు లేదా బాగా బరువున్న పుస్తకాన్నో ఉపయోగించి కండరాలను దృఢంగా చేసుకోవచ్చు. అలాంటి వర్కవుటే ఇది. 

నడుము పైభాగానికి..: వెల్లకిలా పడుకోండి. కాళ్లను 45 డిగ్రీల కోణంలో మడిచి, పాదాలు పూర్తిగా నేలకు ఆనించండి. దిండు లేదా పుస్తకాన్ని పట్టుకొని, రెండు చేతులనూ పైకి చాచండి. అలాగే నడుము పై భాగాన్ని పైకి లేపుతూ, కూర్చోండి. అంటే ఏ సపోర్టూ లేకుండా లేవాలన్నమాట. ఇప్పుడు కాళ్లను పూర్తిగా దగ్గరకు మడిచి, గదవను మోకాళ్లకు ఆనించే ప్రయత్నం చేయండి. చేతులు నేలకు సమాంతరంగా చాచాలి. మళ్లీ మొదటి పొజిషన్‌కు వచ్చేయండి. ఇలా నిమిషంలో ఎన్ని సాధ్యమైతే అన్ని చేయండి.

మోకాళ్లకి..: వెల్లకిలా పడుకొని, దిండు/ పుస్తకాన్ని పట్టుకొని, చేతులు పైకి చాచండి. కాళ్లు పూర్తిగా జాపాలి. ఇప్పుడు దిండు/ పుస్తకాన్ని మీ ఛాతీపైకి తీసుకురండి. తరువాత మోకాళ్లను మీ ఛాతీని తాకించి, చేతుల్ని పైకి ఎత్తండి. మళ్లీ మొదటి భంగిమకు వచ్చేయండి. ఇదే విధంగా 15 సెట్లు చేయండి. 

తొడ కండరాలకు..: వెల్లకిలా పడుకొని, పిక్కల మధ్య దిండు/ పుస్తకాన్ని ఉంచండి. అదే పొజిషన్‌లో కాళ్లను పైకి లేపండి. గుర్తుంచుకోండి... దిండు/ పుస్తకం కింద పడకూడదు. అదే సమయంలో తలను కూడా నిదానంగా ఎత్తండి. తిరిగి మొదటి పొజిషన్‌కు వచ్చేయండి. ఇలా నిమిషంలో చేయగలిగినన్ని సెట్లు చేయండి.