దొంగతనానికెళ్లి... చేపల పులుసు తిని... తన్నులు తిని

కన్యాకుమారి : దొంగతనానికెళ్ళాడు., వంటగదిలో చేపలు పులుసు చూసి టెంప్ట్ అయ్యాడు., కడుపు నిండా తినేసి నిద్రపోయాడు. చివరికు... జనాలకు చిక్కి తిన్నదంతా అరిగేలా తన్నులు తిన్నాడు. తమిళనాడులోని కన్యాకుమారి జిల్లాలో ఈ ఘటన చోటుచేసుకుంది. వివరాలిలా ఉన్నాయి.

సతీష్ అనే యువకుడు దొంగతనం చేసేందుకు ఓ ఇంట్లోకి దూరాడు. అయితే... నగలు, నగదు వంటి విలువైన వస్తువులేవీ లభించకపోవడంతో నిరాశ చెందాడు. ఇక తిరిగి వెళ్లిపోదామనుకునేసరికి... వంటగదిలో చేపల కూర ఘుమఘుమలు రమ్మని పిలిచాయి. అసలే ఆకలితో ఉన్నాడో ఏమో... ఓ పట్టుపట్టేద్దాం అని కూర్చున్నాడు. కూర రుచిగా ఉండటంతో కడుపు నిండా లాగించేశాడు.

ఆ తర్వాత మేడపైకి వెళ్లాడు. భుక్తాయాసంతో అతడి కళ్లు మూతలు పడ్డాయి. అంతే... మేడ పైనే మైకం వచ్చినట్లు పడుకునిపోయాడు. బారెడు పొద్దెక్కినా మెలకువ రాలేదు. ఇంతలో ఇంటి యజమాని వచ్చేశాడు. ఇంట్లో చిందరవందరగా ఉన్న వస్తువులు చూసి దొంగతనం జరిగినట్లు తెలుసుకున్నాడు. ఈ విషయాన్ని ఇరుగుపొరుగువారికి చెప్పాడు. ఇంట్లో సీసీటీవీ కెమేరాలో రికార్డైన వీడియోను చూసి మేడపైకి వెళ్లారు. నిద్రపోతున్న దొంగను చూసి షాకయ్యారు. అనంతరం అతడిని పోలీసులకు అప్పగించారు.