చిన్న కండ్లేరు చెరువుకు గండి

చిన్న కండ్లేరు చెరువుకు గండి

మట్టి వేస్తున్నా ఆగని నీరు

కట్ట తెగితే 4వేల ఎకరాల్లో  పంట మునిగే ప్రమాదం

భయాందోళనలో రైతులు

పుల్లలచెరువు, డిసెంబరు 18 : జిల్లాలోనే అతిపెద్ద రెండో చెరువు అయిన పుల్లలచెరువు చిన్నకండ్లేరుకు గండిపడింది. మొదట తూము నుంచి నీరు లీకైంది. శనివారం సాయంత్రం 5గంటల సమయంలో ఏకంగా గండి పడింది. దీంతో నీరు ఉధృతంగా బయటకు పోతోంది. ఇరిగేషన్‌, పోలీస్‌ శాఖ అధికారులు, గ్రామస్థులు, రైతులు గండి పూడ్చేందుకు రాత్రంతా మట్టిపోసే పనులు చేస్తున్నారు. అయినప్పటికీ కట్టడి చేయలేకపోయారు.  జేసీబీలు, ట్రాక్టర్ల ద్వారా మట్టి పోయిస్తున్నప్పటికీ 25 అడుగుల మేరకు నీటిమట్టం ఉండటంతో నీటి ఉధృతికి వేసిన మట్టి వేసినట్లే కొట్టుకుపోతోంది. దీంతో కట్ట దిగువ ప్రాంత రైతులు ఆందోళన చెందుతున్నారు. కట్ట తెగితే దానికింద 4వేల ఎకరాల్లో తమ పంటలు కొట్టుకుపోతాయని భయపడుతున్నారు. గండిని పూడ్చేందుకు ఏం చేయాలో తెలియక అధికారులు తలలు పట్టుకుంటున్నారు. గత నెలలో తిరుపతిలో రాయల చెరువుకు గండి పడినప్పుడు అక్కడి అధికారులు ఇసుక, సిమెంట్‌ బస్తాలతో పూడ్చారు. దీంతో  ప్రమాదం నుంచి బయట పడ్డారు. చిన్నకండ్లేరు చెరువుకు పడిన గండిని కూడా పూడ్చాలంటే మట్టితో అయ్యే పని కాదని, ఇక్కడ కూడా సిమెంట్‌, ఇసుక బస్తాలు వాడాల్సిందేనని పలువురు సూచిస్తున్నారు. తెల్లవారేసరికి అధికారులు ఎలాంటి చర్యలతో గండిని పూడ్చి, నీటి ఉధృతిని నిలువరిస్తారో చూడాలి. ఈ విషయంపై మండల ఇరిగేషన్‌ ఏఈ సుధాకర్‌  మాట్లాడుతూ.. చిన్న కండ్లేరు చెరువు తూము నుంచి లీకేజీ కాకుండా అడ్డుకట్ట వేసేందుకు చర్యలు చేపట్టామన్నారు. శనివారం రాత్రంతా అడ్డుకట్ట వేసేందుకు తగిన ఏర్పాట్లు చేస్తామని చెప్పారు.