వ్యవసాయ చట్టాలకు వ్యతిరేకంగా బెంగాల్ అసెంబ్లీలో తీర్మానం

కోల్‌కతా: పశ్చిమ బెంగాల్లో త్వరలో జరగనున్న అసెంబ్లీ సమావేశాల్లో నూతన వ్యవసాయ చట్టాలకు వ్యతిరేకంగా తీర్మానం చేయాలని సీఎం మమతా బెనర్జీ నేతృత్వంలోని తృణమూల్ కాంగ్రెస్ ప్రభుత్వం నిర్ణయించింది. కేంద్ర ప్రభుత్వం ఇటీవల తీసుకొచ్చిన ఈ వివాదాస్పద చట్టాలను వెంటనే కొట్టివేయాలని తీర్మానం చేయనున్నట్టు సీనియర్ మంత్రి ఒకరు వెల్లడించారు. ‘‘ఈ నెల 27 నుంచి అసెంబ్లీ సమావేశాలు జరగనున్నాయి. 169 నిబంధన కింద ఈ నెల 28న తీర్మానం ప్రవేశపెడతాం..’’ అని రాష్ట్ర పార్లమెంటరీ వ్యవహారాల మంత్రి పార్థ చటర్జీ వెల్లడించారు. ఈ తీర్మానంపై రెండున్నర గంటల పాటు చర్చ జరుగుతుందన్నారు. కాగా ఇప్పటికే బీజేపీయేతర రాష్ట్రాలైన పంజాబ్, ఛత్తీస్‌గఢ్, రాజస్థాన్, కేరళ, ఢిల్లీ సహా ఐదు రాష్ట్రాల్లో వ్యవసాయ చట్టాలకు వ్యతిరేకంగా అక్కడి ప్రభుత్వాలు తీర్మానాలు ఆమోదించాయి.