అర్హుల జాబితా ప్రదర్శనపై నిర్లక్ష్యం

ఆర్బీకేల్లో కానరాని సున్నా వడ్డీ రాయితీ జాబితా

రేపటితో ముగియనున్న అభ్యంతరాల స్వీకరణ గడువు

అనంతపురం అర్బన, నవంబరు 20: రైతుభరోసా కేంద్రాల్లో 2020-21 రబీ సీజనలో పంట రుణాలపై సున్నా వడ్డీ రాయితీకి అర్హులైన రైతుల జాబితా ప్రదర్శించడంపై వ్యవసాయ అధికారులు, సిబ్బంది నిర్లక్ష్యం వహిస్తున్నారు. ఈనెల 19 నుంచి 22వతేదీ వరకు జాబితాలు ప్రదర్శించంతోపాటు అభ్యంత రాలుంటే తీసుకోవాలని ఆదేశించారు. జిల్లాలో 2020-21 రబీ సీజనలో 6613 మంది రైతులకు రూ.49.36 లక్షల సున్నా వడ్డీ వర్తింపజేశారు. ఆ మేరకు క్షేత్ర స్థాయిలో ఆర్బీకేలకు సున్నా వడ్డీ అర్హులైన రైతుల జాబితాను పంపినట్లు జిల్లా వ్యవసాయ శాఖ అధికారులు పేర్కొంటున్నా క్షేత్ర స్థాయిలో ఆ విషయాన్ని రైతులకు తెలియ జేయడంలో స్థానిక అధికారులు, సిబ్బంది నిర్లక్ష్యం వహిం చడం విమర్శలకు తావిస్తోంది. అభ్యంతరాలకు మరో రెండు రోజులే అవకాశం ఉంది. రైతులకు జాబితా ప్రదర్శన విషయాన్ని తెలియజేసి అభ్యంతరాలు ఇచ్చేందుకు సదుపాయం కల్పించాల్సి ఉంది. మరి ఏ మేరకు వ్యవసాయ యంత్రాంగం చర్యలు తీసుకుంటుందో వేచిచూడాల్సిందే.