Home Minister: సైబర్‌ పోలీస్ స్టేషన్లను పెంచుతాం

- హోంశాఖ మంత్రి అరగ జ్ఞానేంద్ర హమీ

బళ్లారి(బెంగళూరు), డిసెంబరు 26 (ఆంధ్రజ్యోతి): రాష్ట్రంలో 31 జిల్లాల్లో సైబర్‌ పోలీస్ స్టేషన్లు ఏర్పాటు చేస్తామని రాష్ట్ర హోం శాఖ మంత్రి అరగ జ్ఞానేంద్ర(State Home Minister Araga Gyanendra) తెలిపారు. ఇప్పటికే రాష్ట్రంలో ఉండే సైబర్‌ పోలీస్టేషన్లకు తోడు మరిన్ని చోట్ల అదనంగా ఏర్పాటు చేస్తామన్నారు. బెళగావి విధానసౌధలో జరుగుతున్న శీతాకాల సమావేశంలో సోమవారం ప్రశోత్తరాల సమయంలో సభ్యులు పీఆర్‌ రమేష్‌, టీఏ శరవణ మా ట్లాడారు. రాష్ట్రంలో సైబర్‌ నేరాలు బాగా పెరిగిపోయాయని, సామాన్యులు మోస పోతున్నారని వివరించారు. ఇందుకు హోంశాఖ మంత్రి బదులిచ్చారు. రాష్ట్రంలో ప్రతి జిల్లాలో సైబర్‌ పోలీస్టేషన్లు ఏర్పాటు చేస్తున్నామని, సైబర్‌ నేరగాళ్లను గుర్తించేందుకు సీఐడీ విభాగంలో ప్రత్యేక శిక్షణ కేంద్రాన్ని ఏర్పాటు చేశామన్నారు. సైబర్‌ నేరగాళ్లు బ్యాంకు ఖాతాలను హ్యాక్‌ చేయడం తదితర కారణాలతో సుమారు రూ. 70 కోట్లు నగదును ఖాతాదారులు మోసపోయునట్లు సైబర్‌ పోలీసులు గుర్తించారని ఇందులో కొంత నగదును రికవరీ కూడా చేశారన్నారు. బ్యాంకులో నగదు పోయిన వెంటనే ఖాతాదారులు సైబర్‌ పోలీస్టేషన్‌లో ఫిర్యాదు చేస్తే 24 గంటల్లోపు సైబర్‌ దొంగల ఖాతా నుంచి డబ్బులు తిరిగి పోగొట్టుకున్న వారి ఖాతాలోకి జమ అయ్యేలా చేస్తామన్నారు.