దైవాన్ని ప్రార్థిస్తూ.. దేవుని చెంతకు!

సాయిబాబా పాదాల వద్ద గుండెపోటుతో భక్తుడి మృతి

భోపాల్‌, డిసెంబరు 4: దైవ సన్నిధిలో దేవుణ్ని ప్రార్థిస్తూనే దైవంలో ఐక్యమయ్యాడు ఓ భక్తుడు. మధ్యప్రదేశ్‌లోని కట్నీ పట్టణంలో షిర్డీసాయి ఆలయంలో ఈ ఘటన చోటుచేసుకుంది. రాజేశ్‌ మేహానీ అనే భక్తుడు స్థానిక సాయిబాబా ఆలయంలో పూజలో పాల్గొన్న అనంతరం బాబా విగ్రహం పాదాల వద్ద కూర్చుని ప్రార్థిస్తూ అలాగే ప్రాణాలొదిలాడు. బాబా పాదాల వద్ద తలవాల్చి కూర్చున్న రాజేశ్‌ ఎంతసేపటికీ పైకి లేవకపోవడంతో తోటి భక్తులు పూజారికి సమాచారం అందించారు. ఆయన వచ్చి రాజేశ్‌ను కదపగా.. అపస్మారక స్థితిలో ఉన్నాడు. వెంటనే అతణ్ని ఆస్పత్రికి తరలించగా, అప్పటికే మృతి చెందినట్లు వైద్యులు తేల్చారు. ఆలయంలో ప్రార్థన సమయంలో రాజేశ్‌కు ‘నిశ్శబ్ద’ గుండెపోటు వచ్చినట్లు నిర్ధారించారు. స్థానికంగా మెడికల్‌ షాపు నిర్వహించే రాజేశ్‌.. ప్రతి గురువారం బాబా గుడికి వస్తుంటాడు. ఈ క్రమంలోనే అతడు మృతి చెందిన ఘటన సీసీ ఫుటేజీ సోషల్‌ మీడియాలో వైరల్‌గా మారింది.