Ban vs Ind: ముగిసిన బంగ్లాదేశ్ రెండో ఇన్నింగ్స్.. భారత్ ఎదుట స్వల్ప లక్ష్యం

ఢాకా: భారత్‌తో జరుగుతున్న రెండో టెస్టులో బంగ్లాదేశ్ రెండో ఇన్నింగ్స్ ముగిసింది. 231 పరుగులకు ఆలౌటై పర్యాటక జట్టుకు 145 పరుగుల లక్ష్యాన్నినిర్దేశించింది. భారత బౌలర్లు పోటీలు పడి వికెట్లు తీయడంతో క్రీజులోకి వచ్చినట్టే వచ్చి బంగ్లాదేశ్ బ్యాటర్లు వెనుదిరిగారు. దీంతో బంగ్లాదేశ్ బ్యాటింగ్ ఆర్డర్ కుప్పకూలింది. జకీర్ హసన్ (51), లిటన్ దాస్ (73) అర్ధ సెంచరీలతో ఆదుకునే ప్రయత్నం చేసినా బౌలర్లు వారి ఆటలు సాగనివ్వలేదు.

చివర్లో నూరుల్ హసన్ (31), తస్కిన్ అహ్మద్ (31) కాసేపు పోరాడి స్కోరు పెంచే ప్రయత్నం చేశారు. బంగ్లా బ్యాటర్లలో ఆరుగురు ఆటగాళ్లు సింగిల్ డిజిట్ దాటలేకపోయారు. భారత బౌలర్లలో అక్షర్ పటేల్ మూడు వికెట్లు తీసుకోగా, రవిచంద్రన్ అశ్విన్, మహ్మద్ సిరాజ్ చెరో రెండు వికెట్లు, ఉమేశ్ యాదవ్, ఉనద్కత్ చెరో వికెట్ పడగొట్టారు. అంతకుముందు బంగ్లాదేశ్ తన తొలి ఇన్నింగ్స్‌లో 227 పరుగులు చేయగా, భారత్ 314 పరుగులు చేసింది.