Munugode By Election: కేటీఆర్ నోరు అదుపులో పెట్టుకుంటే మంచిది: బండి సంజయ్

నల్లగొండ: మంత్రి కేటీఆర్‌ (KTR)కు బీజేపీ నేత బండి సంజయ్ వార్నింగ్ ఇచ్చారు. కేటీఆర్ నోరు అదుపులో పెట్టుకుంటే మంచిదని హెచ్చరించారు. శనివారం ఆయన మీడియాతో మాట్లాడుతూ దేవుడి గురించి మాట్లాడే అర్హత కేటీఆర్‌కు లేదన్నారు. తప్పు చేశారు కాబట్లే తన సవాల్‌ను కేసీఆర్ స్వీకరించలేదన్నారు. ‘‘అవినీతిపరులైన మీరు తిరిగిన తెలంగాణను సంప్రోక్షణ చేయాలి. నలుగురు ఎమ్మెల్యేలను ఎందుకు దాచిపెడుతున్నారో చెప్పాలి. టీఆర్ఎస్ (TRS) డబ్బుతోనే కాంగ్రెస్ ప్రచారం చేస్తోంది. ఈనెల 31న 9 మండలాల్లో 9 బహిరంగ సభలు నిర్వహిస్తాం. సీఎం కేసీఆర్ (CM KCR) సహా 16 మంది మంత్రులు, ఎమ్మెల్యేలు డ్రగ్స్‌కు బానిసలయ్యారు. అందుకే డ్రగ్స్ కేసును కనుమరుగు చేశారు’’ అని బండి సంజయ్ ధ్వజమెత్తారు.

బండి సంజయ్ ప్రమాణంతో యాదాద్రి మలినమైంది: కేటీఆర్

బీజేపీ నేత బండి సంజయ్ (Bandi Sanjay) ప్రమాణంతో యాదాద్రి ఆలయం మలినమైందని ఎద్దేవాచేశారు. ప్రమాణాలతో సమస్యలు పరిష్కారం కావని, చెప్పులు మోసిన చేతులతో ప్రమాణాలు చేయడం తగదని ఆయన హితవుపలికారు. యాదాద్రి ఆలయాన్ని సంప్రోక్షణ చేయాల్సిన అవసరం ఉందని కేటీఆర్ అభిప్రాయపడ్డారు. 8 ఏళ్ల పాలనలో బీజేపీ చేసిందేమీ లేదని తప్పుబట్టారు. బీజేపీ (BJP) దివాళాకోరు రాజకీయాలు చేస్తోందని దుయ్యబట్టారు. మునుగోడు ఉపఎన్నికలో అసాధారణ పరిస్థితి కనిపిస్తోందన్నారు. బీజేపీ నేతలు వ్యక్తిగత దూషణలు చేస్తున్నారని, ఫ్లోరోసిస్ సమస్యపై బీజేపీ ఎందుకు స్పందించలేదు? అని కేటీఆర్ ప్రశ్నించారు.