With love to mom: అమ్మకు ప్రేమతో..ఇంట్లో తల్లి విగ్రహం ప్రతిష్ట

హైదరాబాద్/ముషీరాబాద్‌: మాతృమూర్తిపై తన ప్రేమను చాటుకున్నాడో వ్యక్తి. నవమాసాలు మోసి అల్లారుముద్దుగా పెంచి పెద్దవాడిని చేసిన ఆ తల్లి రుణం తీర్చుకునే విధంగా, రోజూ నిద్రలేవగానే అమ్మను స్మరించుకునేలా ఇంట్లోనే తల్లి విగ్రహాన్ని ఏర్పాటు చేసుకున్నాడు ముషీరాబాద్‌ బాపూజీనగర్‌కు చెందిన టెంట్‌హౌస్‌ యజమాని బాదం శ్రీనివాస్‌.

శ్రీనివాస్‌ తల్లి బాదం వెంకటసూర్యకుమారికి నలుగురు సంతానం. శ్రీనివాస్‌ రెండో కుమారుడు. ఆమె ఏడేళ్ల క్రితం అనారోగ్యంతో చనిపోయారు. ఏడో వర్ధంతిని పురస్కరించుకుని శ్రీనివాస్‌ తన తల్లి విగ్రహాన్ని ఏపీలో తయారు చేయించి ఆదివారం తన ఇంటికి తీసుకువచ్చాడు. ఇంట్లోని ప్రత్యేక గదిలో తల్లి విగ్రహాన్ని ప్రతిష్టించడమేకాక ఆ గదిలో చుట్టూ మాతృమూర్తి ఫొటోలను ఏర్పాటు చేసి అమ్మపై తనకున్న ప్రేమను చాటుకున్నాడు. అయితే, తల్లి విగ్రహాన్ని ఏర్పాటు చేసిన విషయం తెలియడంతో చుట్టుపక్కల వారితోపాటు ముషీరాబాద్‌ ఎమ్మెల్యే ముఠా గోపాల్‌, పలువురు టీఆర్‌ఎస్‌ నాయకులు ఆదివారం శ్రీనివాస్‌ నివాసానికి వచ్చారు. ఆయన తల్లి విగ్రహానికి పూలమాలలు వేసి నివాళులర్పించారు. మాతృమూర్తి విగ్రహాన్ని ఏర్పాటు చేసినందుకు అతడిని అభినందించారు.