కల్లూరులో పట్టాలు తప్పిన గూడ్స్‌ రైలు

గార్లదిన్నె, ఏప్రిల్‌ 2: మండలంలోని కల్లూరు రైల్వే జంక్షన సమీపాన గూడ్స్‌ రైలు పట్టాలు తప్పింది. రైల్వే సిబ్బంది, స్థానికుల సమాచారం మేరకు బెంగళూరు నుంచి గుంతకల్లు వైపునకు గూడ్స్‌ రైలు ఆదివారం తెల్లవారుజామున 2 గంటల సమయంలో వెళుతోంది. కల్లూరు జంక్షన వద్దకు రాగానే గూడ్స్‌ రైలు మధ్య భాగంలో బోగిలు పట్టాలు తప్పాయి. దీంతో రైలు ట్రాక్‌ పక్క కొంతదూరం వరకు దూసుకెళ్లింది. పట్టాలు తప్పిన గూడ్స్‌ బండిలో కార్లు తరలించేవారని అధికారులు తెలిపారు. ఆదివారం ఖాళీ బోగీలతో వెళుతున్న గూడ్స్‌ బండి పట్టాలు తప్పింది. విషయం తెలుసుకున్న రైల్వే ఉన్నతాధికారులు, సిబ్బంది హుటాహుటిన సంఘటనా స్థలానికి చేరుకుని పరిశీలించారు. ఇతర రైళ్లకు ఇబ్బంది లేకుండా ఆదివారం ఉదయం మరమ్మతులు చేశారు. రైలు పట్టాలు తప్పినా ఎలాంటి ప్రమాదం జరగకపోవడంతో రైల్వే సిబ్బంది ఊపిరి పీల్చుకున్నారు. ఇలాంటి సంఘటనే ఇదే జంక్షనలో గత ఏడాది డిసెంబరులో కూడా జరిగింది. ఎక్కువ బోగీలు ఉన్నప్పుడు ఇలాంటివి జరుగుతుంటాయని కొందరు రైల్వే అధికారులు అభిప్రాయపడ్డారు.